Anëtarët e Këshillit të Lartë të Prokurorisë kanë zgjedhur me 10 vota Alfred Ballën në krye të këtij institucioni.
Balla ka qenë deri më tani Zv.Kryetar i KLP-së, institucioni më i lartë në Sistemin e Drejtësisë për prokurorët. Balla zëvendëson Gent Ibrahimin, të cilin i kishte mbaruar mandati që më 19 dhjetor 2021.
Ai është zgjedhur me vendimin Nr.19/2018, datë 08.02.2018 nga Kuvendi i R.Shqipërisë, anëtar i Këshillit të Lartë të Prokurorisë si përfaqësues i Shoqërisë Civile.
Alfred Balla ka përfunduar studimet e larta për drejtësi në vitin 1991 pranë “Universitetit të Tiranës”; studimet pasuniversitare, master shkencor në të drejtën penale në vitin 2012 pranë Universitetit “Justiniani I-rë” dhe mban titullin Doktor i Shkencave Juridike (e drejtë penale) nga viti 2020 pranë “Universitetit Europian të Tiranës”.
Në vitet 1991-1998 ka punuar në detyrën e Prokurorit të sektorit gjyqësor, Zv/Prokurorit të Rrethit dhe Prokurorit të Rrethit në prokuroritë Fier e Lushnje. Në vitet 1998-2003 dhe 2007-2012 ka ushtruar profesionin e lirë si avokat.
Në vitet 2003-2006 ka punuar pranë Këshillit të Ministrave si Inspektor në Departamentin e Kontrollit të Brendshëm Administrativ dhe Antikorrupsionit. Në vitet 2012-2017 ka punuar në pozicionin si Këshilltar Ligjor pranë Gjykatës së Lartë.
Gjatë viteve të punës është angazhuar në organizma jo-qeveritare të shoqërisë civile me fokus drejtësinë penale dhe mbrojtjen e të drejtave të njeriut Balla ka kryer një sërë trajnimesh profesionale brenda dhe jashtë shtetit.
Ka ushtruar dhe ushtron aktualisht edhe detyrën e pedagogut të jashtëm pranë universiteteve të ndryshme në lëndët e drejtë zakonore, procedurë civile, e drejtë penale e posaçme dhe e përgjithshme, praktikë profesionale etj.
Çfarë është KLP, cilat janë detyrat e institucionit:
KLP është organi kryesor i qeverisjes së gjyqësorit. Detyrat (kompetencat) e KLGJ përfshijnë:
1. Bën plane strategjike për zhvillimin e sistemit të prokurorisë dhe monitoron ecurinë e zbatimit të tyre;
2. Raporton çdo vit para Kuvendit dhe publikut mbi gjendjen e sistemit të prokurorisë;
3. Miraton standartet e etikës prokuroriale dhe mbikqyr respektimin e tyre nga ana e gjyqtarëve;
4. Emëron (dhe cakton në pozicione konkrete) prokurorët e shkallës së parë dhe të dytë;
5. Përzgjedh dhe i propozon Kuvendit kandidatët për Prokuror të Përgjithshëm;
6. Transferon dhe ngre në detyrë prokurorët;
7. Vlerëson veprimtarinë etike dhe profesionale të prokurorëve;
8. Vendos masa disiplinore mbi prokurorët që kryejnë shkelje disiplinore;
9. Jep mendim në lidhje me numrin e përgjithshëm të prokurorëve dhe numrin e prokurorëve për çdo zyrë prokurorie.
10. Bën deklarata publike në mbrojtje të prokurorëve të veçantë kur e gjykon të nevojshme.
11. Bashkëpunon me Shkollën e Magjistraturës në lidhje me trajnimin vazhdues të gjyqtarëve;
12. Jep opinione ose bën propozime lidhur me ndryshimet në legjislacionin që mund të ndikojë në punën e prokurorisë dhe ligjin e procedurës penale;
13. I kërkon Inspektorit të Lartë të Drejtësisë të kryejë inspektime tematike ose hetime për shkeljet individuale;
14. Rekruton, emëron, vlerëson dhe disiplinon funksionarët e lartë të adminisrtaës së prokurorisë.
15. Harton dhe zbaton buxhetin e vet.