Me një investim prej 173.5 milionë lekësh ka nisur rikualifikimi urban i bllokut 91, qendrës së ”Kinostudios” dhe sheshit ”Kinostudio”. Ky investim i cili pritet të përfundojë brenda 12 muajsh do t’u shërbejë rreth 8000 banorëve të kësaj zone, të cilët kanë mbi 40 vjet që nuk shikojnë investime, siç bënë të ditur banorët e zonës. i pranishëm në nisjen e punimve Kryetari i Bashkisë ka përmenduar se ky investim u shërben rreth 20 mijë qytetarve të cilët kryejnë aktivitetin e përditshëm. “Blloku i Kinostudios ku ndodhemi sot (dje) është jo vetëm shtëpia e mbi 8000 qytetarëve të Tiranës, por edhe një qendër e rëndësishme dhe sipas planit urbanistik të sapo miratuar dje nga Kryeministri Berisha, një pol i rëndësishëm zhvillimi, në veçanti për industrinë kinematografike, mediat por edhe artin dhe kulturën si dhe për një sërë industrish të tjera punëdhënëse. Kthimi i vëmendjes tek ky bllok i cili jo vetëm është shtëpia e mbi 8000 qytetarëve të Tiranës por është edhe një zonë ku gjatë ditës kemi mbi 20 mijë qytetarë që kryejnë aktivitetet e tyre të përditshme, është mbajtje e premtimit dhe në të njëjtën kohë është edhe angazhimi ynë, për t’i shtrirë investimet në çdo cep të qytetit” – u shpreh Basha gjatë fjalës së tij.
Banorët
Banorët e lagjes kanë kanë përshëndetur investimin e bashkisë duke e vlersuar Kryebashkiakun Basha si njeriun e vetëm që po punon për qytetin. “Pas një investimi të ’72, këtu për herë të parë po na premtohet dhe ka nisur puna për të shtruar një asfalt në Kinostudio, ca sheshe, tregje e ca trotuare, lulishte e shatërvanë. Është i vetmi Kryetar Bashkie që e shoh duke hyrë nëpër baltë e nëpër rrugë, kudo, përfshi edhe këtu në Kinostudio” – deklaroi një nga banorët e zonës. Projekti i rikualifikimit urban në këto blloqe parashikon shtrimin e 13 mijë metra katrorë asfalt, mbi 1 mijë metra katrorë trotuare dhe 16 mijë metra gjelbërim. Ky projekt është buxhetuar tërësisht me fondet e Bashkisë për vitin 2013, pas konsultimit me këta banorë.
Projekti
Projekti parashikon ndërtim të sistemit të ujësjellësit dhe kanalizimeve të ujërave të zeza e të bardha, vendosjen e 147 shtyllave për ndriçimin rrugor, mbjelljen e 396 pemëve dhe shkurreve dekorative dhe vendosjen e mbi 36 stolave, spostim të linjave elektrike dhe telefonisë, ndërtim mur dekorativ. Do të ndërtohet sistemi i vaditjes për sipërfaqet e gjelbra, për ndërtimin e shatërvanit etj. Kryebashkiaku Basha tha se kjo është nisja e fazës së punimeve në rreth 30 blloqe anembanë qytetit. “Është nisja e fazës së punimeve për 30 blloqe të tilla anembanë qytetit të Tiranës, me një investim total me mbi 80 milionë euro, ku të paktën gjysma e fondeve garantohen nga Bashkia e Tiranës dhe gjysma tjetër nëpërmjet qeverisë së Kryeministrit Berisha dhe Fondit të Zhvillimit Rajonal, për të cilin gjej rastin të falënderoj qeverinë shqiptare. Përkrahja me fonde nuk ka munguar as në të kaluarën, as para dy vitesh. Ajo që ka munguar është dëshira për bashkëpunim, në interes të qytetarit. Sot (dje), kjo dëshirë dhe ky vullnet është evident. Ne po bashkëpunojmë me qeverinë shqiptare për investime si ky dhe investime të tjera të mëdha anembanë qytetit. Është në dorë të qytetarëve të Tiranës, të vendosin që ky bashkëpunim të vazhdojë për të mirën e tyre, për interesin e qytetit të Tiranës, për interesat e qytetarëve të Tiranës dhe unë jam i bindur se kështu do të vendosin” – theksoi kreu i Bashkisë.
7 mijë banorë të njësisë 6, pas 22 vitesh furrnizohen me ujë
Rreth 7 mijë banorë të njësisë bashkiake numër 6 do të kenë nga dje ujë të pijshëm në shtëpitë e tyre. Në këtë bllok banimi me 700 familje, uji i pijshëm ka munguar prej 22 vitesh. Kryebashkiaku Lulzim Basha është rikthyer në këtë zonë një muaj pasi u premtoi instalimin e rrjetit të ujësjellësit me një tjetër premtim të mbajtur për banorët. “Që nga dita e sotme, 7000 banorë të kryeqytetit të cilët nuk kanë pasur ujë prej 22 vitesh në shtëpitë e tyre, sot kanë ujë të rrjedhshëm, si rezultat i një investimi të kryer nga UKT, të cilët dua t’i përgëzoj, dua të përgëzoj kontraktorin për punën e kryer në një kohë kaq të shkurtër. Konkretisht, në bllokun ku ndodhemi sot, tek Unaza e Re, 700 familje po marrin ujë për herë të parë, që kur janë bërë banorë të Tiranës” – u shpreh Basha. Kreu i Bashkisë u ka premtuar banorëve se siç mbajti premtimin për ujësjellësin, do të bëjë dhe rikualifikimin urban të këtij blloku banimi, shtrimit të rrugëve, gjelbërim, ndriçim dhe kanalizime të ujërave të zeza e të bardha. “I siguroj se ky është hapi i parë, një premtim i mbajtur që e kemi bërë bashkarisht para disa javësh por ne do të vazhdojmë në këtë zonë, pikë së pari duke stabilizuar rrugën me shtresat e para të stabilizimit dhe së dyti me një rikualifikim urban, sipas të gjithë standardeve që kanë parë edhe në lagjet e tjera të Tiranës, duke përfshirë trotuare, asfalt, ndriçim dhe gjelbërim, sepse qytetarët e kësaj zone janë qytetarë të Tiranës dhe meritojnë të trajtohen si të tillë, pavarësisht prej neglizhencës, harresës dhe përbuzjes që kanë përjetuar në të gjithë këto vite” – theksoi Basha.
