Nuk kishte dyshime, por tani është zyrtare. Barcelona ka shkarkuar nga detyra Quique Setién pas humbjes së rëndë 8-2 kundër Bayern Munich, që solli edhe eliminimin nga Liga e Kampioneve.
Klubi “blaugrana” është mjaftuar me një popstim të shkurtër në rrjetet sociale për të njoftuar largimin e teknikut, të vendosur në shënjestër pas disfatës katastrofike në çerekfinalet e Champions.
Po ashtu, Barcelona bën të ditur se tekniku i ri do të zyrtarizohet shumë shpejt. Gjithsesi, nuk ka dyshime që në pankinën e ekipit katalunjas do të ulet Ronald Koeman.
Pas vizitës së shpejtë në Barcelonë, trajneri është kthyer në Amsterdam bashkë me drejtorin e përgjithshëm të klubit spanjoll Oscar Grau, që do të nëgociojë personalisht me Federatën Holandeze të Futbollit për të lënë të lirë Koeman. Nuk priten pengesa, pasi tekniku e ka të përcaktuar në kontratën me kombëtaren e Holandës se mund të largohet nëse ka një ofertë nga Barcelona. Ronald Koeman do të lidhet si fillim me skuadrën “blaugrana” me një kontratë 2-vjeçare, duke marrë përsimër një mision të vështirë pas tronditjes së rëndë që solli humbja shkatërruese në Champions League.
