Një ngjarje e rëndë kriminale është regjistruar në orët e para të mëngjesit në Shkodër. Dy persona të maskuar me motoçikletë kanë qëlluar me armë dhe kanë kërcënuar një person në rrugën Shkodër – Velipojë, afër fshatit Daragjat. Sipas burimeve, personi që u paralajmërua nga “maskat” quhet Alban Luka, 50 vjeç, nga fshati Darragjat.
Burime pranë Policisë së Shkodrës bëjnë me dije se ngjarja ka ndodhur rreth orës 6:00 të mëngjesit kur dy personat me motor dhe të maskuar i kanë zënë pritë makinës Benz, ku udhëtonte 50-vjeçari Luka me një të afërm.
Sipas dëshmisë së dhënë para Policisë nga ai vetë, autorët e kanë ulur në gjunjë drejtuesin e makinës duke e kërcënuar dhe pastaj kanë qëlluar me automatik.
Fatmirësisht, nuk ka pasur viktima. Policia po punon për identifikimin e autorëve të kësaj ngjarjeje të rëndë e cila rikthen krimin në Shkodër.
