Këshilltari i LSI-së, në këshillin bashkiak të Tiranës, Prof Asoc Eltjon Halimi, ka ngritur shqetësimin se banorë të Tiranës janë ankuar se iu vonohen përgjigjet nga bashkia për zgjidhjen e problemeve që ata adresojnë.
Nëpërmjet një postimi në facebook Halimi ka bërë apel për zgjidhjen e kësaj situate, ndërsa shkruan se bashkia i justifikon këto vonesa me arsyetimin e mungesës së punonjësve me leje.
Postimi i Halimit në Facebook:
Apel për zgjidhjen e shqetësimeve të qytetarëve!
Për të disatën herë kemi patur shqetësime nga banorë, të cilëve iu vonohen përgjigjiet nga Bashkia e Tiranës, me arsytimin e mungesës së punonjësve me leje.
Nisur nga përgjegjësia për qytetarët që përfaqësojmë, si dhe nga interesi për zgjidhjen sa më të shpejtë të shërbimeve që duhet të ofrohen në kohë dhe cilësi, kemi komunikuar me drejtuesit e Bashkisë, ku edhe pse disponimi i tyre ka qënë për zgjidhjen sa më të shpejtë të problematikës së hasur, përsëri qytetarët nuk kanë marë shërbimet e kërkuar.
Duke apeluar për zgjidhjen sa më të shpejtë të këtyre problematikave të hasura, besojmë që nuk do të përsëriten më në të ardhmen.
