Arrestohet biznesmeni Enver Shala, i cili ishte shpallur në kërkim pas shembjes së tre kateve në një pallat tek Shkëmbi i Kavajës. Shala kërkohej nga policia, pasi ndaj tij nisi procedimi penal pasi rezulton të jetë edhe pronari i këtyre kateve.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale” Shkatërrimi i pronës nga pakujdesia” dhe “Shkelje të rregullave të mbrojtjes në punë”.
NGJARJA
Më datë 17 shkurt, ora 13:15, tek Shkëmbi i Kavajës, u shembën tre katet e fundit të një pallati 22-katësh, tek Shkëmbi i Kavajës, duke terrorizuar kështu banorët. Fatmirësisht nga shembja nuk ka patur dëme në njerëz, por vetëm dëme materiale. Ashtu edhe siç u raportua më herët, tre katet e fundit kanë qenë me konstruksione metalike , të papërfunduara punimet, pasi nuk dispononte leje ndërtimi.
PRECEDENTI
Sipas burimeve të “BalkanWeb” mësohet se biznesmeni në fjalë ka marrë leje ndërtimi për pallatin 22 katësh, 20-të mbi tokë dhe 2 nën tokë. Por punimet për përfundimin e 3 kateve të sipërme ishin ndërprerë prej 8 vitesh që kur ish-komuna e Rrashbullit kërkoi në gjykatë prishjen e këtij pallati, për shkak se ishte ndërtuar në vijën e parë të bregut të detit.
Ndonëse gjykata vendosi në favor të biznesmenit Shala, ku i fundit nuk ka arritur t’i përfundonte punimet për shkak të disa dokumenteve që i mungonin. Burime të “BalkanWeb” thonë se leja e fundit në Bashkinë e Durrësit është kërkuar në vitin 2016-të. Bashkia nuk i ka kthyer përgjigje, ndërsa gjatë kësaj kohe katet e sipërme janë amortizuar së tepërmi duke degraduar deri në këtë pikë, sa u shembën sot. Biznesmenit Enver Shala i është prishur edhe një tjetër biznes, siç ishte kompleksi Kamelia në Durrës në vitin 2013. Ai po ashtu është ndërtuesi i një tjetër pallati gati 30 katësh në afërsi të portit të Durrësit, ku 8 kate shtesë janë pa leje. Kur u ndërtuan katet pa leje këshilli bashkiak vendosi shembjen e tyre, por asnjë firmë nuk mori përsipër riskun të shembte katet e sipërme të një godine kaq të madhe. Kujtojmë se Shala me një vendimin të datës 17 maj 2014 të gjykatës së Durrësi është arrestuar për “Ndërtim pa leje”.
