Shpërthimi i një sasie tritoli tronditi pasditen e djeshme Fushë-Krujën, ndërsa versione të shumta u dhanë në lidhje me ngjarjen.
Burime nga policia kanë bërë të ditur se kanë mundur që të identifikojnë autorin e hedhjes së tritolit dhe kanë zbardhur edhe arsyet e këtij akti terrorist.
Policia mësohet se ka shpallur në kërkim 49-vjeçarin S. K., nga Fushë Kruja, i cili është autori kryesor i hedhjes së tritolit në një parking automjetesh në lagjen “Punëtori” të këtij qyteti.
I shpalluri në kërkim e ka hedhur tritolin në një makinë të parkuar para një rrobaqepësie në pronësi të S. T., 48 vjeç. Burimet thanë se i shpalluri në kërkim e ka bërë këtë akt terrorist për shkak të një sherri familjar që kanë pasur ata.
Si pasojë e shpërthimit të tritolit janë dëmtuar edhe 5 makina të tjera që ndodheshin të parkuara aty.
