Pishtari olimpik ka udhëtuar në disa nga monumentet më të njohura në Brazil. Mbrëmjen e së enjtes flaka olimpike u mbajt nga modelja e famshme braziliane Adriana Lima në zemër të bulevardit Olimpik në Praça Maua, një ditë përpara çeljes së ceremonisë zyrtare të Lojërave Olimpike në Rio de Janeiro.
Adriana është fotografuar e lumtur dhe krenare që më në fund arriti të mbajë pishtarin olimpik në vendlindjen e saj. Në profilin e saj në Instagram, modelja braziliane është shprehur se është shumë e lumtur që iu realizua dëshira e cila dukej si e pamundur për të.
“Një emocion i madh për realizimin e një ëndrre të madhe për mua. Dukej pothuajse e pamundur që të mbaja flakën olimpike në vendin tim të shtrenjtë, në Brazilin tim të dashur,” ka shkruar modelja Lima.
