18 milionë euro do të kushtojë vetëm faza e parë e ndërtimit të Teatrit të ri Kombëtar.
E megjithëse Gjykata Kushtetuese rrëzoi procedurën e shembjes së teatrit, askush nuk është ndëshkuar për atë çfarë ndodhi më 17 maj 2020.
Bashkia e Tiranës ka hapur këtë të martë tenderin teksa në SPAK qëndrojnë ende paditë e ngritura për shembjen e Teatrit Kombëtar.
Por kjo nuk e ka ndalur Erion Veliajn të vijojë me hapin e radhës për ndërtimin e godinës së re.
Ky vendim i bashkisë Tiranë vjen pak muaj para zgjedhjeve lokale.
Sipas njoftimit të tenderit publik, vlera e fondit limit për fazën e parë të punimeve për ndërtimin e Teatrit Kombëtar është 1 miliardë e 854 milionë lekë dhe do të qëndrojë i hapur deri në në datën 3 nëntor, ku do të priten ofertat dhe më pas do të bëhet vlerësimi i tyre.
Sipas dokumenteve të njoftimit të tenderit, bashkia e Tiranës do të kërkojë nga kompania fituese që të ndërtojë godinën e re të Teatrit Kombëtar brenda një afati prej 27 muajsh.
Teatri do të ndërtohet sipas projektit të Bjarke Ingles, që u financua nga kompania Fusha, e cila fillimisht do të ndërtonte teatrin me koncension, por më pas u tërhoq.
Tashmë financimi i ndërtimit të godinës së Teatrit Kombëtar do të realizohet nga buxheti i shtetit.
Kujtojnë se shembja e godinës së Teatrit Kombëtar u bë në 17 maj të vitit 2020 në orët e para të mëngjesit, ku pavarësisht një rezistence të gjatë nga aktorë dhe aktivistë të shoqërisë civile, policia mbështeti aksionin e IKMT-së, duke larguar të gjithë të pranishmit që refuzonin të dilnin nga godina./oranews
