Kryeministri Edi Rama ka qenë i thirrur në Komisionin Hetimor për Inceneratorët, në cilësinë e dëshmitarit, ku është pyetur nga Jorida Tabaku për një sërë çështjesh.
Tabaku e pyeti Ramën, nëse Arben Ahmetaj njihet me përfituesit e inceneratorëve. Kryeministri deklaroi se nuk është në kompetencat e tij të dijë se “kush është mik i kujt, kush fle dhe zgjohet me kë”.
Pjesë nga biseda në komision:
Jorida Tabaku: Zoti dëshmitar, zoti kryeministër, a është Arben Ahmetaj një mik i afërt me tre përfituesit e inceneratorëve?
Edi Rama: E kuptoj që Big Brotheri ka krijuar audiencë të madhe dhe mbase edhe mes nesh ka patur që e kanë ndjekur. Por, se kush është mik i kujt, se kush fle me kë, se kush zgjohet me kë, nuk janë të parashikuara në dispozitat kushtetuese të kryeministrit të Shqipërisë. Si kryeministër është jashtë kompetencave të mia të studio miqësitë e secilit prej jush. Si dëshmitar, mendoj se ju po shkelni ligjin. Si zoti Rama, po ju them se jam i painteresuar, që kur kam qenë me pantallona të shkurtra, se çfarë bëjnë të tjerët dhe kam refuzuar të jap llogari se çfarë bëj vetë në jetën private.