Kryeministri Edi Rama shpalli ekipin e tij të ri për mandatin e tretë. Po në radhën e ndarjes së detyrave ra në sy që njeriu më i goditur politikisht ishte Taulant Balla, që në fakt rezulton deputeti më i votuar në rang Republike, me më shumë vota edhe se vetë Rama.
Që nga sot Balla nuk do të jetë më njeriu i dytë më i fuqishëm politik në këtë parti, pasi është larguar nga detyra e Sekretarit të Përgjithshëm të Partisë Socialiste, vend të cilin e ka zënë, ish-ministri Damian Gjiknuri.
Edhe pse arriti një rezulat të mirë për partinë në votimet e 25 prillit në qarkun e Ebasanit, dhe nominalisht mori mbi 21 mijë vota, Balla i ka sjell plot probleme Ramës gjatë fushatës zgjedhore.
Ishte qarku ku ndodhi një vrasje për arsye politike dhe emri i tij u lakua për lidhje me bandat e këtij qyteti.
Edhe vetë ambasadorja Yuri Kim u detyrua të ulej këmbënkryq në Elbasan për të parë procesin e numërimit të votave.
Tashmë deputeti i Librazhdit që ka karrierë të gjatë në PS, që nga ndihmës i Fatos Nanos, do të mbajë vetëm detyrën organizative të kreut të Grupit Parlamentar, ndërsa nuk do të ketë funskione politike brenda partisë më të madhe në vend.