Marjus Dema, i cili është autori i dyshuar i vrasjes së shokut të tij Mehmet Qema, është rikthyer në vendin e krimit i shoqëruar nga forca të shumta policore, për të ndërtuar dhe njëherë dinamikën e ngjarjes së rëndë. Burime bëjnë me dije se shoqërimi i tij për në vendin e krimit, është për shkak se ende nuk është gjetur arma me të cilën u qëllua mbi Qemën.
Burime bëjnë me dije se në katin e dytë të objektit ku ndodhi vrasja, janë gjetur dy makineri që prodhojnë monedha dixhitale, bitcoin. Mbetet e paqartë nëse ato kanë qenë në pronësi të miqve që frekuentoheshin shpesh së bashku në zonën e 5 Majit.
Dema është vetëdorëzuar në polici, së bashku me shtetasin Frenkli Myftari, i cili ka qenë po ashtu i pranishëm në momentin e krimit, dhe akuzohet për fshehje të krimit.
Mësohet se dorëzimi i dy të rinjve është bërë pas negociatave të shumta që kanë bërë me ta edhe familjarët e avokatët, ndërkohë që mbetet ende mister shkaku i vrasjes, pasi autori dhe viktima kishin miqësi prej disa vitesh së bashku.
Për ngjarjen vazhdojnë që të mbeten në kërkim shtetasit Erlind Peka, Bralid Aga, Blerim Hoti (reperi i njohur si Lim Hoti, mik me Stresin) e Xhuljano Koçi, ndaj të cilëve rëndojnë akuzat “Moskallëzim krimi” dhe “Veprime që pengojnë zbulimin e së vërtetës”.
Mehmet Qema, 27-vjeç u ekzekutua pak para mesnatës në një lokal në zonën e 5 Majit në Tiranë, ku pavarësisht se ishte e ndaluar lëvizja, të rinjtë ishin duke konsumuar alkool prej kohësh.
Qema u qëllua me një plumb në gjoks, dhe më pas u dërgua në spitalin e QSUT-së nga vetë shokët e tij, një pjesë e të cilëve janë ende në kërkim.
Qema njihej në zonën ku ka ndodhur ngjarja pasi ishte banor i saj, dhe për faktin se shoqërohej me personazhe të njohur dhe problematik teksa qëndronte vazhdimisht në zonën ku ndodhi krimi.
Ende nuk dihet nëse krimi ka ardhur aksidentalisht apo jo.
