Atletetja shtatzënë, Aminat Idrees, 26 vjeç nga Nigeria ka fituar një medalje të artë në Festivalin Kombëtar të Sporteve, në kategorinë Mixed Poomsae në Taekwondo, në një garë që u cilësua vërtet “frymëzuese”.
“Është një privilegj i madh për mua. Vendosa ta provoj pasi të stërvitesha dy here në ditë dhe … ndihem vërtet mirë,” tha ajo.
“Para se të mbetesha shtatzënë, gjithmonë më ka pëlqyer stërvitja, kështu që nuk ndryshoi asgjë me shtatzëninë,” shtoi Idrees.
Sidoqoftë, jo të gjithë e kanë parë frymëzuese pjesëmarrjen e saj në lojëra, disa e kanë kritikuar për shkak të fazës së përparuar të shtatzënisë.
Idrees tha se shumë nga kritikët e saj nuk janë në dijeni të formave të ndryshme të Taekwondo.
“Shumë njerëz nuk e kuptojnë se çfarë është Taekwondo në të vërtetë. Unë mendoj se kjo është një rrugë për të edukuar njerëzit për këtë. Taekwondo ka dy degë: sportin luftarak dhe Poomsae – e cila është një kombinim taktik i lëvizjeve kundër sulmeve imagjinare në Taekwondo, ” tha 26-vjeçarja.
Ndërkohë, në një deklaratë për mediat, kryetari i komitetit organizues të Festivalit Kombëtar të Sporteve, Philip Shaibu, tha se Idrees u lejua të merrte pjesë në lojëra pas ekzaminimit mjekësor.
