Analisti Agron Gjekmarkaj ka komentuar në rubrikën ‘’Opinion’’ në News24 dy ndryshimet në qeverinë Rama me Çuçin që zëvendëson Lleshajn, dhe Milva Ekonomin që merr postin e hapur të ministrisë së bujqësisë.
Gjekmarkaj thotë se brenda këtyre ndryshimeve ka një lajm të mirë që është shumë i vogël dhe një lajm i keq që është shumë i madh.
Sipas tij, Çuçi nuk është figurë irrituese, si dhe është njeri i qetë dhe normal, por nga ana tjetër është i besuar i Ramës dhe tashmë ministri i brendshëm do të jetë vegël 100% e Ramës.
Nga ana tjetër edhe për Milva Ekonomin Gjekmarkaj ka vlerësime pozitive, por për të thotë se s’ka lidhje me bujqësinë si dhe edhe ajo si Çuçi është e besuar dhe e bindur e Ramës.
‘’Gjëja e parë që më erdhi në mendje, nuk besoj fare tek teoritë konspirative, duket sikur kanë dalë nga vëllazëria e SOROS. Këtë të lënë të kuptosh. Nuk e konsideroj SOROS-in kulak. Ka një lajm të mirë që është i vogël, dhe lajm i keq që është i madh.
Çuçi nuk është figurë irrituese, është i qetë dhe normal. Nuk ka tërhequr shumë vëmendje negative, edhe pse është akuzuar nga opozita. Lajm i keq është që Çuçi është nga më të bindurit të Ramës, nga më të afërmit. Pra që ministri i brendshëm do jetë vegël 100% i Ramës. Dhe do atakohet menjëherë nga opozita, pasi me të drejtë gjykimi i bashkohet paragjykimit.
Duke parë eksperiencën e mëparshme të brendshëm, Sandër Lleshaj, që u shkarkua, ka qenë distant nga Rama, nga Ardi Veliu. Si i tillë nuk i bënte më punë Ramës. Ky është lajmi i keq. Një ministër i brendshëm që i bashkohet drejtorit të Policisë, Veliu ëpr të cilin po kërkohet dorëheqja, parë dhe zgjedhjet përpara. Shoh lajme shumë të këqija.
Sa i përket Milva Ekonomit. Nuk ka lidhje me bujqësinë. U shkarkua njëherë si ministre, është zonjë e nderuar. Vetë Rama e shkarkoi atëhere se ishte pa rezultate.
Rama ka vendosur dy njerëz të besuar, por bujqësia s’është kaq prevalente sa e brendshmja. Dy njerëz që marrin urdhëra nga Rama dhe i zbatojnë pa mëdyshje. ‘’-tha Gjekmarkaj.
Sa i përket SandërLleshajt, Gjekmarkaj konstaton se nuk beson tek dorëheqja e tij por është i bindur se e ka shkarkuar Rama. Analisti thotë se dallohej qartë se kishte një marrëdhënie të ftohtë dhe distancim Lleshaj-Rama, prandaj kryeministri e ka hequr pasi nuk i bënte më punë duke parë që janë dhe zgjedhjet para.
‘’I kam ndjekur prononcimet e ish-ministrit të brendshëm, deklaratat e tij dhe ka dalë që ka pasur një ftohtësi me Ramën, marrëdhënie të ftohta. Duket se arsyet e brendshme ne nuk i dimë, të ngrira, ka pasur rrjedhje informacioni se përplasjet kanë qenë 2-3 raste me gjuhë mjaft të ashpër nga kryeministri. Dhe dukej se nga çasti në çast do e largonte Lleshajn. Kjo që erdhi, vrasja i dha mundësinë Ramës të bënte politikë, të prezantonte standardin që udhëheq kryeministri, dhe i dha mundësinë të hiqte Lleshajn.’’- shtoi Gjekmarkaj.
