Nënkryetari i Partisë Demokratike, Edi Paloka, i ftuar ne Ora News thotë se Edi Rama më 25 prill është i humbur dhe asnjë makinacion nuk e shpëton nga kjo.
Ndryshimi i kodit zgjedhor pa konsesus, sipas Palokës është i pa pranueshëm, por kjo thotë ai po bëhet nga mazhoranca nën efektin e frikës dhe tmerrit që kanë nga largimi.
Edi Paloka: Praktikisht zgjedhjet janë shpallur, presidenti i Republikës ka shpallur zgjedhjet dhe që nga momenti që është shpallur dita, ne jemi në proces zgjedhor.
Të tentosh të ndryshosh rregullat e lojës, kur loja ka filluar, vetëm një si Rama mund ta bëjë.
Paloka nuk i kursen ironitë për Kryeministrin, kur thotë se ai që është angazhuar për të zgjidhur konfliktet mes shteteve të tjera, nuk respekton marrëveshjet e veta që garant kanë ndërkombëtarët.
Edi Paloka: Ky njeri, kryetari i OSBE-së që pretendon se do të zgjidhë mosmarrëveshjet e Lukashenkos me opozitën e tij, nuk pranon jo të zgjidhë problemet që ka me opozitën shqiptare, por nuk i qëndron një marrëveshje që ka nënshkruar vetë.
Ndryshimi i rregullave nuk e shqetëson. Paloka thotë se asnjë instrument nuk e shpëton Ramën nga humbja.
Edi Paloka: Me lista të hapura, pa lista të hapura, me koalicione, pa koalicione, çdo formë që të tentojë të përdori ai është i humbur. E kanë zhytur në gropë dhe nuk del sikur të hidhet përpjetë.
Sa i përket organizimit për fushatë, nënkryetari Paloka, thotë se Partia Demokratike është gati dhe po shpalos alternativën e saj qeverisëse.
Shpëtimi i Shqipërisë thotë ai nuk është vetëm largimi i Ramës por dhe garantimi i një qeverisje për qytetarët.
