Ish- deputeti i LSI, Luan Rama ka një mesazh ngushëllimi dhe emocionues për vdekjen e Rikard Lajres, aktorit të mirënjohur shqiptar.
Rama thotë se Ljarja nuk mund të ike kurrsesi ndryshe, pasi gjithë jetën e jetoi fisshëm dhe me virtyte.
Po ashtu ai shpreh edhe dhimbjen që ka duke u shprehur artistikisht ”nuk gjej dot mal tjetër ku ta peshoj dhimbjen”.
Në fund Luan Rama e falenderon Rikard Ljarjen për çfarë i dha atij dhe shqiptarëve duke e konsideruar si mik, shok dhe vëlla.
STATUSI I LUAN RAMËS
KRONIKË BARDHEZI
Në përcjellje të Rikard Ljarjes!…
Po ta marr borxh titullit e njërit prej librave që më pate dhuruar i dashur Rikard, për t’u mbështetur në ty se nuk gjej dot mal tjetër ku ta peshoj dhimbjen.
Kronikë bardhezi në zinë e bardhë të ikjes tënde, shenjtërisht të fisme e pamatshëm të dhimbshme!
Sepse ti kurrësesi nuk mund të ikje ndryshe!
Gjithë jetën tënde e jetove fisshëm, duke na dhënë Rikardin që kush nuk do të donte t’i ngjante.
Na dhe Rikardin; njeriun e virtytshëm dhe aktorin e papërsëritshëm, bashkëshortin dhe prindin gjithë dashuri, na dhe regjisorin e guximshëm e gjurmëshënjues në filmin shqiptar.
Por, në të njejtën përmasë na dhe edhe Rikardin muzikant, instrumentist të talentuar, piktor dhe shkrimtar të përjetimeve realiste, i cili bujarisht na e fali të gjithë botën e vet me aq art dhe elegancë zotnie, me aq shpirt dhe shenjtëri frymëzimi, si dëshmi e një përmase të epërme e krejt të veçantë të madhështisë tënde.
Të madhështisë tënde të fisme e të pazhurmë…
Na dhe gjithçka. Pa na kërkuar asgjë.
Ndaj sot, në ditën e përcjelljes, të falem nderit me mirënjohje për gjithçka bëre e na dhe, si pakkush!
Dhe ike mirësisht i bardhë dhe madhërisht i paqtë në këtë ditë zi dhe pikëllimë Rikard Ljarja!
Ike në amëshim…
Të ndrittë shpirti
mik, shok, vëlla!
