Deputetja e Partisë Demokratike, Dhurata Çupi në një prononcim për “Koha Jonë” deklaron se projekt i “Unazës së Re” është tërësisht abuziv dhe korruptiv. Anëtarja e komisionit parlamentar të Ekonomisë, bën thirrje që të merren masa të dëmshpërblehen të gjithë banorët që ju cënohet prona e tyre nga realizimi i këtij projekti të dyshimtë.
Prej tre javësh, banorët e Astirit janë në rrugë. Sa të drejtë kanë banorët në kërkesat e tyre dhe si e shikoni qendrimin e qeverisë, konkretisht të kryeministrit Rama të shprehur në Kuvend për këtë çështje?
Qytetarët e prekur nga investimi në Unazën e Re gjenden në një situatë të rëndë sociale. Kemi të bëjmë me një gjendje kritike në të gjitha aspektet. Si në aspektin e trajtimit të pronës së tyre si e drejtë kushtetuese dhe ligjore.
Kemi të bëjmë me nxjerrjen në rrugë të mijëra qytetarëve pa iu shpërblyer djersën dhe lodhjen e tyre për të pasur banesën ku të jetojnë me dinjitet. Dhe nga ana tjetër, miliona euro të taksapaguesve shqiptarë të shpërdoruara dhe të abuzuara me procedura korruptive.
Banorët kanë paguar çdo taksë e detyrim si qytetarë të Tiranës. Kanë votuar në atë zonë. Janë banorë të Tiranës prej më shumë se 20 viteve. Ata duhet të shpërblehen në mënyrë të drejtë siç edhe e kërkon Kushtetuta. Duhet të njoftohen sipas ligjit. Të merren masa të dëmshpërblehen të gjithë banorët që ju cënohet prona e tyre.
Kryeministri Rama si argument kryesor për refuzimin e kerkesave të banorëve solli intimidimin e shqiptarëve, se dëmshpërblimin e banorëve do ta paguajnë shqiptarët nga xhepat e tyre. Po në rast se kjo çështje shkon në Strasburg kush do ta paguajë faturën e banorëve? Sipas jush si zgjidhet kjo çështje, pa përfunduar në dyert e gjykatave dhe duke shmangur përplasjet fizike mes shtetit dhe banorëve
Theksoj se ndërkohë të gjitha procedurat e iniciuara lidhur me këtë projekt janë në shkelje flagrante me ligjin. Kemi një projekt me kosto marramendëse e pa precedent në këto përmasa, 40.5 milion euro për 2 km investim si rruga më e shtrenjtë në Europë e ndarë në tre kontraktore. Transparenca dhe mungesa e konkurrencës pa dyshim tregon korrupsionin më të madh të konsumuar nga administrate e Edi Ramës.
Nga ana tjetër duket të ketë interesa okulte për zhvillimin e asaj zone me ndërtime të klientelës qeverisëse. Prandaj arroganca dhe fyerjet e qeverisë ndaj këtyre qytetarëve nuk ka ndalesë. Sepse interesat e qeverisë janë në shërbim të xhepit të tyre dhe klientëve të saj. Qytetarët janë në të drejtën e tyre dhe besoj se e drejta, djersa dhe mundi i këtyre qytetarëve do të fitojë. Jo vetëm unë por të gjithë deputetët e opozitës dhe mijëra qytetarë janë në mbështetje të çështjes së tyre. Çështjes së dinjitetit njerëzor për të patur banesën e tyre.
Nga: Linda Noka dhe Jonida Halili
