Sekretari i Përgjithshëm i PS-së, Taulant Balla gjatë fjalës së tij në mbledhjen e sotme të Asamblesë Kombëtare të partisë, u fokusua te zgjedhjet vendore, duke theksuar se për PS ky është viti i organizimit elektoral në funksion të fitores së zgjedhjeve.
“Zgjedhjet vendore janë 17 muaj larg nga sot, për ne ky vit është i një organizimi elektoral në funksion të fitores së zgjedhjeve vendore elektorale. Nuk ka njohur vendi më parë një program si rilindja urbane, por nuk ka dyshim se nuk ka asnjë bashki që nga Tirana në Konispol që nuk ka vend për përmirësime të mëtejshme te shërbimet, fokusi i punës së bashkive duhet të jetë shërbimet në kohë e cilësi, qëndrimi pranë njerëzve për të dhënë zgjidhjet për këdo. Në pranverë do të ketë anketime për performancën e të zgjedhurve në krye të bashkive, asnjë mbështetje politike nuk do të ketë për ta, nëse aleati ynë i vetëm qytetarët nuk do të japin dakordësinë për kandidaturat. Në zgjedhjet vendore ne hyjmë vetëm me një koalicion, atë me qytetarët, përballë kemi ata që e duan politikën armë për të ruajtur privilegjet dhe që opozitën e duan cadër për t’u mbrojtur nga drejtësia”- tha ai.
