Skuadra e Bazelit është shpallur dje matematikisht kampione në Super Ligën e Zvicrës. Ekipi ku aktivizohet edhe mesfushori i kombëtares shqiptare, Taulant Xhaka, ka fituar ndeshjen e vlefshme për javën e 30 me rezultatin 1-2 në transfertë ndaj Luzernës, duke mbyllur llogaritë e titullit edhe për këtë vit.
Ky është titulli i 20 në historinë e klubit të Bazelit dhe gjithashtu i 8-i radhazi. Hegjemonia e kuqebluve në Zvicër nuk u thye as këtë vit teksa pas 30 javësh numërojnë 77 pikë të grumbulluara ndërkohë që kanë mbetur edhe 6 javë për t’u luajtur.
Pas ndeshjes, futbollistët dhe tifozët e Bazelit kanë filluar festën, e cila ka vazhduar gjatë. Në një moment të festës, fansat e kampionëve kanë brohoritur në kor edhe emrin e mesfushorit shqiptar.
