Sikundër edhe paralajmëroi në twitter, eurodeputeti gjerman Knut Fleckenstein, do të ketë një axhendë të ngjeshur takimesh në ditën e parë të vizitës në vendin tonë.
Takimin e parë informal, Fleckenstein e zhvilloi me Ambasadorët e BE dhe SHBA, Romana Vlahutin dhe Donald Lu në hotel “Rogner”.
Në një prononcim të shkurtër për mediat lidhur me protestën e opozitës, ai tha se vendi i çdo force politike është në parlament.
“Protesta duket e qetë.Vendi i çdo force politike është në parlament.Do takoj Bashën dhe do diskutojmë, por nuk do negocioj”.
Më pas sëbashku me Vlahutin iu drejtuan Kryeministrisë, ku zhvilluan një takim me shefin e qeverisë Rama. Takimi përfundoi në orën 11:37.
“Pata një takim të mirë me kryeministrin Edi Rama. Do të takoj Metën dhe Bashën. Nuk do shkoj tek protesta e opozitës”.
Axhenda e takimeve vijoi me një takim me kreun e Kuvendit Ilir Meta në orën 11:45. Takimi perfundoi ne oren 12:54, ndërsa ishte i pranishëm edhe Ministri i Drejtësisë Vasili.
Në orën 15:45, eurodeputeti gjerman Knut Fleckenstein do të zhvillojë një takim me Ministren e Integrimit, Klajda Gjosha.
Mësohet se Fleckenstein ka parashikuar një takim gjatë pasdites dhe me liderin e opozitës Lulzim Basha, por nuk ka një orar të përcaktuar.
Takimi pritet me interes në një kohë që opozita ka hyrë në ditën e katërt të protestës.
