Mbi 8 milionë euro po investohen në rrugën e plazhit në tri projekte të ndryshme: në ndërtimin e rrugës, rikualifikimin e zonës dhe ujësjellës kanalizime.
Në të gjithë zonën e plazhit, nga Ura e Dajlanit deri te sektori “Hekurudha”, rruga nacionale dhe rrugët dytësore, janë gërmuar në fillim të verës, dhe rinisën pas mbylljes së sezonit veror. Punimet në rrugën e plazhit në Durrës nisën pas 15 shtatorit, por me hapin e breshkës, dhe po zvarriten nga firma zbatuese e tyre, pohojnë banorët e zonës së plazhit në Durrës.
“Po punojnë dy punëtorë. Një herë në katër ditë i shikojmë. Në vend të kishin mbyllur punimet, ato po i zvarrisin”, thotë i irrituar një banor.
Në tjetër banore e cila ka një biznes të vogël, tregohet më e “butë”, sepse nuk do të ketë konflikt me firmën apo edhe bashkinë. “ I shohim që po punojnë, ne presim kur do t’i mbyllin punimet , sepse këtë kërkojmë nga bashkia” .
Apeli vjen nga të gjithë banorët e zonës së plazhit, për të kryer punime cilësore dhe të shpejta. Këto punime që nisën në muajin qershor u bënë pengesë e madhe për mbarëvajtjen e sezonit veror, ndërsa në dimër ecin me ritmin e breshkës, dhe nuk dihet sa efiçente do të jenë për turizmin vendas.
