Stuhia tropikale e njohur si “Hermine” ka zbarkuar në Floridën veriore, duke u bërë uragani i parë që ka goditur shtetin në 11 vjet. ‘Hermine’ ka goditur bregdetin në gjirin e Floridës në mëngjesin e sotëm, duke sjellë rreshje të mëdha të shiut dhe përmbytje në shumë zona. Ndërkaq raportohet se një person i pastrehë humbi jetën pasi një pemë u rrëzua mbi të. Guvernatori Rick Scott ka shpallur gjendje të jashtëzakonshme në 51 qarqe, ndërsa banorët po përgatiten për stuhi të rrezikshme. Shpejtësia e erës arriti në 80 mph (130 km/h), bëjnë të ditur nga Qendra Kombëtare për mbrojtjen kundër uraganeve. Sipas zyrtarëve, rreth 70 mijë shtëpi janë evakuuar, ndërsa nga qendra për mot kanë paralajmëruar edhe përmbytje.