Kapja politike, Komisioni i Venecias paralajmëroi se sjell kapjen e gjithë sistemit gjyqësor në vend

Pas shumë përplasjesh dhe akuzash, reforma në drejtësi ka mbetur vetëm në një çështje, në mënyrë që të kalojë me konsensus në Parlament. Edhe pse të hënën mazhoranca e dërgoi draftin në Parlament, sërish e ka lënë derën e hapur për opozitën që të bëhet ndryshimi i draftit për mënyrën e emërimit në Këshillin e Lartë Gjyqësor dhe Këshillin e Lartë të Prokurorisë, por jo për Komisionin e Posaçëm të Kualifikimit dhe në Kolegjin e Apelimit. Për këto dy organe, kryeministri Edi Rama ka thënë se nuk ka negociata dhe ato janë vija e kuqe e reformës. Mirëpo, opozita kërkon që të katërta organet të kenë një formulë emërimi me “vende të rezervuara”. Pyetja që lind natyrshëm është se, përse mazhoranca nuk do që të ndryshojë formulën e emërimit për organet e vetingut? Përgjigjen e ka dhënë vetë Komisioni i Venecia në draftin e tij, ku është shprehur se kapja politike e Komisionit të Kualifikimit dhe Kolegjit të Apelimit, rrezikon që të kapet i gjithë sistemi gjyqësor në vend. Bëhet fjalë për raportin e parë të Venecias, i mbërritur në dhjetor 2015. Në atë kohë, drafti i reformës në drejtësi parashikonte që të vendoste kryeministri për vëzhguesit ndërkombëtarë që do të kontrollojnë procesin e kualifikimit. Atëherë, Venecia në paragrafin 98 shprehej se kapja politike e vetingut ndikon në të gjitha organet e tjera. Në dokument thuhej se kalimi pa konsensus krijon tension të jashtëzakonshëm brenda sistemit gjyqësor, destabilizon punën e tij, shton mosbesimin e publikut mbi këtë sistem, heq vëmendjen e gjyqtarëve nga detyrat e tyre të përditshme dhe, si një masë mjaft e jashtëzakonshme, krijon riskun e kapjes së sistemit gjyqësor nga forca politike e cila kontrollon procesin. Një deklaratë e tillë nga Venecia konfirmon faktin se reforma në drejtësi synohet që të kapet politikisht dhe kjo fillon që me organet e vetingut. Dyshimet janë se nëse PS fut njerëzit e saj aty, atëherë do i ketë të gjithë gjyqtarët në dorë, pasi sapo të nisë reforma ata do i nënshtrohen një procesi rivlerësimi.