Standard.al

Ekskluzive e “STANDARD”/ Berisha denoncon planin grek për detin: Rama po u fal zonat e gazit dhe naftës me vlerë 1 trilion euro

Zgjedhjet/ Berisha: Rama është i pashpresë. Urrejtja për të personalisht është mbarëpopullore, do arkivohet në analet e zeza të historisë njëlloj si etërit e tij

1

EKSKLUZIVE 

Ish-kryeministri i vendit Sali Berisha flet në një intervistë ekskluzive për  “Standard” mbi synimet e Greqisë për t’u zgjeruar me 12 milje në Detin Jon si edhe qëndrimin e palës shqiptare lidhur me këtë çështje. Sipas Berishës, ky vendim përbën ndryshim të regullave në mes të lojës, ndërsa thekson se Greqia përfiton në kurriz të Shqipërisë. Po ashtu ai denoncon sjelljen dhe veprimet e qeverisë shqiptare si edhe personalisht të kryeministrit Rama, si sot në ekzekutiv ashtu edhe në 2009, kur ai drejtonte opozitën dhe kundërshtoi marrëveshjen mes dy vendeve për Detin.

Në intervistën për “Standard” ish-kryeministri flet edhe mbi pandeminë dhe pasojat e saj si edhe problematikat që po kalon vendi me borxhin e lartë publik si edhe emigracionin masiv. “Rritja e borxhit publik është një ndëshkim i rëndë për çdo shqiptar nga Edvin Rama dhe narkoqeveria e tij, është një barrë e rëndë mbi të ardhmen e tyre. Kjo rritje është rezultat direkt i korrupsionit gjigand, kriminalizimit të ekonomisë dhe shkatërrimit të klimës së biznesit, largimit të investitoreve vendas dhe të huaj nga Shqipëria.”, pohoi ai.

Në intervistë, ish-kryeministri komentoi edhe prishjen e marrëveshjes së 5 Qershorit nga mazhoranca, duke pohuar se Rama mbylli me këtë akt primitiv dyert për hapjen e negociatave të Shqipërise me BE. Gjithashtu, Berisha dha një koment për gazetën edhe lidhur me marrëveshjen e firmosur mes Kosovës e Serbisë në Shtëpinë e Bardhë, ku e  vlerësoi si një arritje historike.

 

 

STANDARD– Greqia po kërkon zgjerimin e ujërave territoriale me 12 milje në Detin Jon. Ndërkohë pala shqiptare deri më tani e ka cilësuar këtë si një çështje që rregullohet nga e drejta ndërkombëtare, duke theksuar se aty ku e lejon gjeografia, Greqia gëzon të drejtën që të zgjerojë gjerësinë e detit të saj. Ndërkaq kur ishte në opozitë, PS kundërshtoi me forcë marrëveshjen me palën greke ku zgjerimi ishte vetëm me 6 milje. Si e gjykoni këtë qëndrim dhe sa rrezik ka që Greqia të përfitojë në kurriz të territoreve shqiptare me zgjerimin e saj nëse lejohet nga pala shqiptare?

SALI BERISHA- Kemi të bëjmë me një ndryshim dramatik të qeverisë greke, dyfishimin e gjerësisë së ujrave të veta territoriale me implikacione të mëdha serioze e madje vende vende edhe ngushtim proporcional të gjerësisë së ujërave tona territoriale, shelfit dhe zonës ekonomike dhe hapësirës ajrore të Shqipërisë. Me këtë vendim zonat e depozitave të presupozuara gjigande,të gazit dhe naftës  me vlere sipas ekspertëve edhe 1 trilion euro, zhvendosen në territorin e ujërave te saj. Ky është një vendim i njëanshem i qeverisë së Greqisë i bazuar në nenin 3 të Konventës Ndërkombëtare të Detit te Montego Bay, i cili u njeh të drejtën vendeve të zgjerojnë ujërat e veta territoriale deri në 12 milje.

Por vendimi i qeverise greke vetëm në aparencë përputhet me ligjin ndërkombetar të Detit. Në realitet ai bie ndesh me nenin 15 të konventës, i cili përcakton kushtet në të cilat vendet mund të zbatojnë nenin 3 të saj, kushte të cilat në rastin e kufizimit të Greqisë me Shqipërinë nuk ekzistojnë.

Problemi i përcaktimit të kufirit detar, shelfit dhe zonës ekonomike në detin Jon u komplikua me rrëzimin nga Edvin Zografi Bis me Gjykatën Kushtetuese të marrveshjes së Detit të vitit 2009, e cila ishte një marrëveshje shumë e mirë, një histori e vërtet ëin-ëin. Marrëveshja u rrëzua për llogari të një pale të tretë duke perdorur harta te provuara tashmë të fallsifikuara, në të cilat ngushtohej territori shqiptar nga 38 ne 22 km etj etj..

Pas rrëzimit të marrëveshjes, pala greke fillimisht kërkoi rinegocimin e saj por ne refuzuam pasi vendimi i Gjykatës Kushtetuese përcaktonte metodë tjetër për ndarjen e detit, me të cilën nuk ishte dakord asnjëra pale. Ne propozuam që të dy palet, pasi dështoi marreveshja, ti drejtoheshim Gjykatës Nderkombëtare të Detit. Ky propozim u pranua nga qeveria e Pasokut dhe më pas edhe nga qeveria e Neodemokracisë. Pra ne do te çonim në gjykatë ndërkombetare marrëveshjen dhe palët do paraqiteshin me statuskuonë e 6 miljeve Greqia dhe 12 milje Shqipëria.

Në bindjen time ky vendim përbën ndryshim të regullave në mes të lojës pasi të dy vendet janë angazhuar për arritjen e një marreveshje Deti midis tyre.

Por pas ardhjes në pushtet të Zografit Bis ky acaroi, siç ka pohuar vet, me qëllim marrëdhënniet me Greqinë. Më vonë ai pranoi dhe hapi negociatat për marrëveshje te re Deti me Greqinë, madje njoftuan dhe përfundimin e saj. Mirëpo Zografi Bis, në një akt antikombetar kishte negociuar dhe përfunduar një marrëveshje të re duke përdorur hartat e spiunit të detit dhe shkelur nen për nen vendimin e Gjykatës Kushtetuese.

Ky qëndrim kapitullant antikushtetues i Zografit Bis detyroi presidentin e republikës të bllokojë marrëveshjen dhe të kërkoj që në negocimin e saj të të zbatohet vendimi i Gjykatës Kushtetuese dhe të riformatohet grupi negociator. Pasi pala greke u njoh me këto qendrime bëri të qartë se vendimi i Gjykatës Kushtetuese të Shqipërisë është për palën shqiptare dhe jo atë greke.

Pas kesaj, qeveria Cipras u shpreh për zgjerimin e ujerave territoriale nga 6 në 12 milje dhe ditet e fundit këtë vendim shpalli në parlament e Greqisë kryeministri Micotaqis. Pa dyshim ky vendim i disfavorshëm për Shqipërinë është marrë nga qeveria greke. Por nuk ka pikë dyshimi gjithashtu se qendrimi i Zografit Bis ndaj marrëveshjes së vitit 2009, refuzimi  i tij i ujdisë së arritur për të dërguar çështjen në Gjykatën Ndërkombëtare të Detit, acarimi me qëllim siç e pohoi vetë ai të marrëdhënieve me Greqinë, pranimi për të negociuar marrëveshje të re duke shkelur nen për nen vendimin e Gjykatës Kushtetuese, deklarimi i tij se zgjerimi nga 6 në 12 milje i ujërave territoriale nga Greqia nuk prek Shqiperinë dhe nuk ka lidhje me marrëveshjen e Detit, janë një dhunim flagrant i interesit kombëtar dhe mbartin në vehte aktin e tradhëtisë së lartë kombëtare.

Zografi bis gjeti gati çdo gjë për të zgjidhur çështjen me Gjykatën Ndërkombetare të Detit dhe në rast se do vazhdonte me ujdinë e arritur për të dërguar çështjen në gjykatë, problemi do të kishte marrë prej kohësh zgjidhjen më të mirë dhe nuk do te kishim sot një situatë krejt tjetër.

 

STANDARD– Pandemia e koronavirusit ka sjellë një realitet të ri në botë, ku ndryshimet e jetës së përditshme dhe pasojat e krizës janë ndjerë fort edhe në Shqipëri. Cili është mendimi juaj për mënyrën se si shteti e ka përballuar këtë pandemi, si nga ana shëndetësore ashtu edhe nga ajo ekonomike?

SALI BERISHA- Trajtimi dhe menaxhimi i pandemisë në Shqipëri ka qenë dhe është xhahil dhe i papërgjegjshëm i bazuar mbi mashtrimin, manipulimin, terrorin psikologjik, pseudoanketimin epidemiologjik.

Si rezultat i këtij menaxhimi, sot Shqipëria është vendi i vetëm mbi tokë që tremujori i dytë i pandemisë ka dhjetfishim të rasteve të infekuara dhe të vdekjeve nga covid 19 krahasuar me tremujorin e parë. Sot Shqipëria është i vetmi vend që efekti i karantinës ishte shkatërrimtar për ekonominë dhe zero për parandalimin apo kufizimimin e përhapjes se pandemisë.

 

STANDARD- Janë dy fenomenet kryesore që kanë pësuar një rritje galopante gjatë këtyre viteve . Si e gjykoni rritjen e borxhit publik, si edhe emigrimin masiv të shqiptarëve?

SALI BERISHA- Rritja e borxhit publik është një ndëshkim i rëndë për çdo shqiptar nga Edvin Rama dhe narkoqeveria e tij, është një barrë e rëndë mbi të ardhmen e tyre. Kjo rritje është rezultat direkt i korrupsionit gjigand, kriminalizimit të ekonomisë dhe shkatërrimit të klimës së biznesit, largimit të investitoreve vendas dhe të huaj nga Shqipëria.

Kurse emigracioni masiv është zbatimi me përpikmëri nga Zografi Bis i platformës së Vaso Çubrilloviçit të spastrimit etnik të shqiptarëve nga trojet e tyre.

Praktikat që përdor Zografi bis për spastrimin e shqiptarëve nga vendi i tyre janë të njejta me ato që rekomandon Çubrilloviçi për debimin e tyre.

 

STANDARD– Me votimin në 30 korrik, mazhoranca dhe opozita parlamentare duket se i dhanë një goditje të fortë marrëveshjes së 5 Qershorit. A besoni se rikthimi i palëve në Këshillin Politik do të arrijë të rikthejë konsensusin për koalicionet parazgjedhore? Dhe së dyti si e shihni gjendjen e opozitës së bashkuar përballë mazhorancës socialiste, në kuadër të garës elektorale që pritet të zhvillohet pas 7 muajsh?

SALI BERISHA- Nuk e di se çfarë do të bëjnë palet por di se Edvin Kristaq Rama nuk njeh ligj as dhe moral, ai shkelmoi me pabesi marrëveshjen e 5 qershorit dhe mbylli me këtë akt primitiv dyert për hapjen e negociatave të Shqipërise me BE.

Edvini Kristaq Rama është i pashpresë. Urrejtja për të personalisht është mbarëpopullore, ai do arkivohet në analet e zeza të historisë njëlloj si etërit e tij.

 

STANDARD- Cili është komenti juaj mbi marrëveshjen e arritur mes Kosovës e Serbisë në Shtëpinë e Bardhë?

SALI BERISHA – Marrëveshja qe u firmos ne Washington në Shtëpine e Bardhë nga Presidenti i SHBA, Donald Trump dhe Kryeministri i Kosoves, Avdullah Hoti për normalizimin e marrëdhënieve ekonomike midis Kosovës dhe Serbisë mendoj se është një arritje historike për Kosovën dhe kombin shqiptar.

Ajo është një sukses  i padiskutueshëm i diplomacisë së SHBA dhe personalisht e Presidentit  Donald Trump dhe përfaqesuesve të tij. Marrëveshja shënon një kthesë të madhe në marrëdhëniet dhe bashkëpunimin ekonomik midis Kosovës dhe Serbisë por do kete ndikim të rëndësishëm  edhe ne bashkëpunimin dhe stabilitetin rajonal.

Prandaj me kete rast shpreh urimet e mia më të perzemerta për Kryeministrin Hoti, qeverinë dhe popullin e Kosovës për këtë arritje historike si dhe mirenjohjen time  më të thellë SHBA dhe presidentit Trump për rolin e tyre përcaktues në arritjen e kësaj marreveshje.

 

*VINI RE: Nuk lejohet ribotimi i intervistes pa lejen e botuesit dhe pa cituar të drejtat e autorit

 

1 Comment
  1. Luli says

    Bobo. Po ca do ky mo. Kompania amerikane qe prenotoj Berisha ne 2011 tha marreveshja 2009 eshte me e keqja e mundeshme. Si do jepen fushat e naftes kur u dhane ne 2009. Tani po u firuan. I ka ikur logkika fare ketij tobit.

Leave A Reply

Your email address will not be published.

This site uses Akismet to reduce spam. Learn how your comment data is processed.