Ish-nënkryetari i PD-së, Astrit Patozi, deklaron se koha i dha të drejtë Ilir Metës, kur në vitin 2008 hyri në grevë urie dhe kundërshtonte ndryshimin e Kodit Zgjedhor dhe Kushtetutës. Në një reagim në Facebook, Patozi thotë se në atë kohë Ilir Meta kundërshtoi reformën zgjedhorë që i jepte më shumë pushte kryetarëve të partive, ndërsa ai vet si përfaqësues i PD-së e votoi atë reformë. Nga ata tjetër, Patozi kërkon që qëndrimi për ndryshimin e sistemit zgjedhor të jetë një linjë zyrtare edhe e LSI-së. Një ditë më parë, Presidenti Ilir Meta deklaroi se drama e zgjedhjeve në Shqipëri nisi me ndryshimet në Kodin Zgjedhor dhe Kushtetutë në vitin 2008.
Në atë kohë PD dhe PS arritën marrëveshje brenda dy ditëve dhe me bekimin e disa ambasadorëve votuan ndryshimin Kushtetutës, sistemit elektoral, duke futur listat e mbyllura me kandidatë që varen nga kryetarët dhe duke vendosur sistemin proporcional rajonal. Meta, që në atë kohë drejtonte LSI, e kundërshtoi këtë projekt duke parashikuar se ky sistem do të kthente autoriatarizmin e kryetarve dhe do e bënte vendin më pak demokratike.
Deklarata e plotë e Astrit Patozit në Facebook: “Jam dakord plotësisht me Ilir Metën
Jam dakord plotësisht me Presidentin e Republikës, kur thotë se gjendja politike në Shqipëri u rëndua pas ndryshimeve kushtetuese të vitit 2008.
Por do ta mbështesja më shumë në rast se do të shikoja që ky këndvështrim do të shndërrohej në qëndrim zyrtar të LSI-së, si njëra nga partitë kryesore të opozitës.
Do të ishte një kontribut i mirëpritur për kauzën e ndryshimit të sistemit, i cili, sipas meje, është përgjegjësi kryesor për krizën e thellë politike në Shqipëri.
Por mbi të gjitha, mendoj se do t’ia vështirësonte shumë misionin Edi Ramës dhe Lulzim Bashës për ta mbajtur me thonj statuskuonë e listave të mbyllura, si thelbi i një pushteti okult dhe të pamerituar që është keqpërdorur për më shumë se 10 vjet.
Koha i ka dhënë të drejtë Ilir Metës, i cili asokohe ishte në grevë urie për ta kundërshtuar kryetarokracinë, ndërsa unë kam qenë njëri prej atyre që e kanë votuar atë gabim historik, edhe pse nisur nga një qëllim i mirë.
Por politika është dinamike dhe askush nuk mund të mburret për një meritë të dikurshme dhe as të mbajë në shpinë një faj gjithë jetën.
Jo thjesht ngaqë “koka e falur nuk pritet”, por edhe sepse ka gjithmonë kohë dhe mundësi për t’i ndrequr problemet e shkaktuara nga vendimmarrje të gabuara.
Ka vetëm një kusht për të qenë i besueshëm: që, si ndjesa, ashtu edhe distancimi, duhet të bëhen pa hipokrizi”.
