Kohët e fundit kryeministri Edi Rama ka pasur takime të shpeshta me fermerët në zona të ndryshme të Shqipërisë, ashtu siç ishte bashkëbisedimi i sotëm me fermerë të Manzës në Durrës.
Por për liderin demokrat Lulzim Basha, më e rëndësishme se sa dalja në televizor, është qëndrimi pranë familjeve shqiptare që kanë nevojë. Banorët e përmbytur nga reshjet në zonën e Laçit, sipas Bashës – janë lënë në mëshirë të fatit, dhe ndaj ai thekson se në vend të investimeve imagjinare, kryeministri duhet t’i kishte dhënë ndihmë financiare familjeve të përmbytura.
Kreu i Partisë Demokratike i shoqëruar nga disa deputetë të djathtë ishte sot pranë këtyre familjeve, të cilat brenda një viti janë përmbytur disa herë.
“Edi Rama, sa rri në televizor e flet për investime imagjinare, të shkojë në Laç e të shikojë impaktin e “investimeve” të tij. Qindra familje janë në ujë e qindra të tjera në rrezik përmbytje. Asnjë ndihmë nga qeveria, asnjë mbështetje financiare dhe pse brenda një viti janë përmbytur pesë herë. Përballu me qytetarët që i ke lënë në mëshirë të fatit, mos u fshih pas regjisë qendrore me pseudo takime ku atyre që të thonë të vërtetën u mohon të drejtën e fjalës.”, shkruan Basha në një postim në rrjetin social Facebook ku ka publikuar edhe foto nga situata e rëndë e familjeve të përmbytura në Laç.
