Athina është duke bllokuar një marrëveshje të Mbrojtjes dhe Sigurisë BE-Tiranë dhe shkak për këtë është burgosja e Fredi Belerit.
Media greke “Ekathimerini”, shkruan se pak ditë më parë në Bruksel u mbajt një takim në nivel teknik, qëllimi kryesor i të cilit ishte lidhja e një sërë marrëveshjesh të mbrojtjes dhe sigurisë me vendet brenda dhe jashtë Evropës, përkatësisht Kanadanë, Japoninë, Gana, Moldavinë, Norvegjinë dhe Korenë e Jugut.
Greqia kundërshtoi lidhjen e marrëveshjes me Shqipërinë, duke këmbëngulur se duke qenë një vend që dëshiron të anëtarësohet në BE, duhet të jetë në përputhje me acquis evropiane, e cila përfshin respektimin e shtetit ligjor si element bazë.
Në këtë sfond, grekët propozuan Maqedoninë e Veriut si vendin më të përshtatshëm për të lidhur një marrëveshje të mbrojtjes dhe sigurisë me BE-në, pasi ajo ka treguar një performancë më të mirë në fushën e sundimit të ligjit.
Propozimi grek nuk u pranua, por as çështja e Shqipërisë nuk eci përpara, me gjithë mbështetjen shumë të fortë të italianëve.
