Nënkryetari i Partisë së Lirisë, Endrit Braimllari doli sërish sot për denoncimin e procesit në Bashkinë e Kuçovës.
“Siç është bërë publike nga kandidati i koalicionit ‘Bashkë Fitojmë’, Lefter Maliqi në Bashkinë e Kuçovës ka ndodhur një masakër e vërtetë elektorale, e cila ka filluar para ditës së zgjedhjejve, ekzekutuar në 14 maj me një ndërhyrje të shtetit, grupeve kriminale, oligarkëve pranë qeverisë dhe është zbatuar në mënyrë perfekte ky plan dhe nga KAS.
-Nga verifikimi i kamerave rezulton se në 1254 raste ka pasur votim në grup dhe qytetarë që kanë votuar nga dy herë.
– Në kutitë e 18 qendrave të votimit, mungojnë procesverbalet origjinale dhe nuk ekziston procesverbali i dorëzimit të materialeve zgjedhore.
– Në 7 qendra votimi nuk kanë qenë në funksion kamerat e sigurisë që shërbejnë për verifikimin e procesit.
– Në 2 raste ka rezultuar se është përdorur skema e ‘Trenit Bullgar’.
Kandidati Kreshnik Hajdari rezulton i dënuar dhe në emër të Koalicionit “Bashkë Fitojmë” i jemi drejtur Komisionit Shtetëror të Zgjedhjeve në datë 04.04.2023, mbi verifikimin e pastërtisë së figurës së shtetasit Kreshnik Hajdari që në këtë rast është kryetari në detyrë dhe Kandidati i Bashkisë Kuçovë për kryetar bashkie në radhët e Rilindjes, i cili në formularin e vetëdeklarimit ka fshehur deklarimin e dënimit penal në shtetin grek, fakt ky që “sjell përjashtimin e menjëhershëm dhe në çdo kohë nga kandidimi, zgjedhja, emërimi apo nga funksioni publik”.
Dhe pas të gjitha këtyre denoncimeve të bëra publike nuk ka asnjë reagim të prokurorisë apo institucioneve të tjera të cilat me vetëdije të plotë lejuan krimin zgjedhor në Kuçovë.
I bëjmë thirrje SPAK dhe të gjitha institucioneve përgjegjëse që të veprojnë dhe të hetojnë veprimtarinë e Kreshnik Hajdarit dhe krimin zgjedhor në Bashkinë e Kuçovës, pasi nëse do të ishte vepruar në kohë sot nuk do të kishim konsumim të këtij krimi zgjedhor në Kuçovë dhe dukshëm rezultati do të ishtë në favor të kandidatit të ‘Bashkë Fitojmë’, Lefter Maliqi.
