Është caktuar data për shqyrtimin e kërkesës së Gert Shehut në Gjykatën e Apelit të Tiranës, ku kërkon të lirohet nga qelia.
Seanca do të zhvillohet të mërkurën, 28 Dhjetor në orën 12:30. Avokatët e Shehut kanë kërkuar ndryshim mase nga arrest në burg, në arrest shtëpie ose shtrim i detyruar në spitalin psikiatrik.
Shehu ndodhet në arrest për akuzat e goditjes për shkak të detyrës dhe plagosjes së lehtë me dashje, për ngjarjen e ndodhur më 6 Dhjetor ndaj Sali Berishës.
Prokuroria ka kërkuar që Shehu të qëndrojë në burg pa afat, me qëllim daljen e akt ekspertimit psikologjik, që do konfirmojë nëse 31-vjeçari ka apo jo probleme të shëndetit mendor.