Serbia merr mbështetje nga Rusia për ruajtjen e integritetit të saj të pretenduar territorial dhe për tensionet me Kosovën. Ministri i brendshëm, Aleksandër Vulin, zhvilloi një vizitë me takime të rëndësishme në Moskë, duke anashkaluar kërkesat e Bashkimit Europian dhe Shteteve të Bashkuara të Amerikës dhe vlerësuar vëllazërinë shekullore me atë që e konsideron “shtet mëmë”.
Fillimisht atë e prit ministri i jashtëm rus, Sergej Lavrov, i cili i garantoi se vendi i tij do të vazhdojë të mos njohë pavarësinë e Kosovës.
“Ministri Vulin vuri në dukje se Serbia, e udhëhequr nga presidenti Aleksandër Vucic, nuk e harron vëllazërinë shekullore dhe se Serbia është i vetmi vend në Europë që nuk vendosi sanksione ndaj Federatës Ruse dhe nuk u bë pjesë e histerisë anti-ruse”, thuhet në deklaratën e Ministrisë së Punëve të Brendshme të Serbisë pas bisedës me shefin e diplomacisë ruse, Sergej Lavrov.
Gjithashtu shprehet keqardhje që Lavrovit iu pengua vizita në Beograd në muajin qershor. Vulin theksoi se Serbia nuk do ta harrojë kurrë ndihmën e Rusisë dhe presidentit Vladimir Putin, i cili, me ftesë të presidentit Vucic, pengoi miratimin e një rezolute britanike në Kombet e Bashkuara në vitin 2015, sipas së cilës serbët do të shpalleshin komb gjenocidal.
Gjatë qëndrimit në Moskë, ministri serb u takua dhe me zyrtarë të lartë të ushtrisë ruse, përfshirë zëvendësministrin rus të Mbrojtjes, Aleksandar Fomin, duke konfirmuar bashkëpunimin në nivel të lartë mes dyja vendeve në fushën e sigurisë.
Gjithashtu zhvilloi biseda edhe me zyrtarë të kompanive shtetërore që prodhojnë armë dhe pajisje të tjera që përdoren nga ushtria dhe policia e Serbisë.
