Ministrja e Shtetit për Marrëdhëniet me Parlamentin Elisa Spiropali, i është përgjigjur zërave që komentuan negativisht, se gjatë vizitës në Kiev ajo ndërroi 3 kostume brenda një dite.
Përmes një interviste të dhënë për emisionin Kjo javë, Spiropali tha se ndërrimi i veshjeve ishte një akt higjenik, pasi udhëtimi ishte 24-orë me tren.
“Unë e fal padijen, por jo ligësinë. Dhe keqardhje e madhe për mënyrën sipërfaqësore sesi disa njerëz, disa portale, e pasqyrojnë përfaqësimin e Shqipërisë aty, sidomos për një anëtare te delegacionit, grua.
Ne ishim 24 orë në tren, dhe mbi të gjitha ishte një akt higjenik për të gjithë anëtarët e delegacionit, por sigurisht ne gratë merremi më shumë.
U munduam aty të tregonim dinjitetin e Shqipërisë, atë që ka bërë dhe do të bëjë, dhe atë që meriton Ukraina. Nuk kam asnjë koment tjetër se të them të drejtën ligësia më duket qesharake”, tha ajo.
