‘Pse është trembur Edi Rama’.
Kjo është pyetja virale në median sociale teksa komentuesit po ndjekin konferencën për shtyp të kryeministrit.
Ky i fundit e sulmoi ashpër drejtësinë, aq sa kjo konferencë mund të mbahet mend gjatë në agorën politike shqiptare.
Ai iu përgjigj ashpër edhe ndërkombëtarëve, me fokus ambasadoren amerikane, të cilës i tha se nuk i jep leksione anglisht për ndërhyrjet në drejtësi. Amerikës dhe BE-së i tha se reformën në drejtësi e ka bërë ai vetë.
SPAK-ut i kërkoi të hetonte personat që donte vetë ai, edhe pse tha se ky nuk është as presion dhe as ndërhyrje.
Por kulmin e arriti kur tha se do bëjë kallëzime në SPAK për disa kryetarë bashkie të PS-së.
“Do kemi kallëzime edhe për figura të PS-së. Nga njësia anti-korrupsion. Do kemi kallëzime në SPAK për kryetar bashkie të PS-së. Që kanë turpëruar PS dhe duhet t’i kishte kapur më para drejtësia,” tha Rama.
A është kjo arsyeja se Rama është trembur? Përse po flet ai për figura në PS dhe për kryebashkiakë të socialistëve të korruptuar? A po i thotë SPAK se duhet të hetojë vetëm ata që do ai dhe jo vetë atë?
Konferenca e sotme ishte një lumë akuzash e kërcënimesh që tregon qartë se mund të ketë lëvizje të rëndësishme.