Presidenti Ilir Meta i ka akorduar titullin e lartë “Kalorës të Urdhrit të Flamuri”, poetit Llambi Kota.
Meta e cilëson poetin si një njeri që spikati në Kongresin e Manastirit dhe njësimin e alfabetit.
Sipas kreut të Shtetit, personazhe të tilla, duhet të meritojnë mirënjohje të përjetshme dhe nderim të thellë.
Postimi i Ilir Metës:
Liria dhe Pavarësia e Shqipërisë nuk janë dhuruar, por janë arritur falë veprimtarisë së palodhur patriotike, atdhedashurisë dhe sakrificës sublime, të shumë bijve e bijave të këtij vendi, të cilët meritojnë mirënjohje të përjetshme dhe nderimin tonë më të thellë.Një prej tyre është atdhetari i paharruar, veprimtari i Rilindjes Kombëtare, Llambi Kota, me një kontribut të çmuar për çështjen shqiptare, kryesisht gjatë viteve 1908 -1923.
Veçanërisht ai spikati me mbështetjen e Kongresit të Manastirit, për njehsimin e Alfabetit si dhe për mbrojtjen e gjuhës shqipe nën moton: ‘Një komb, një alfabet’, duke punuar për fuqizimin e ndjenjës së shqiptarizmit mbi gjithçka, pa dallim feje apo bindjesh.
Për gjithë këtë kontribut të tij të vyer dhe të paharruar, pata kënaqësinë t’i akordoj këtij patrioti të ndritur, Titullin e lartë “Kalorës i Urdhrit të Flamurit”.
