Komisioni i Pavarur i Kualifikimit vendosi sot shkarkimin nga detyra të prokurorit të Sarandës, Lorenc Mërkuri. Vendimi u mor nga trupi gjykues i kryesuar nga Lulzim Hamitaj, me relatore Xhensila Pinen dhe anëtare Valbona Sanxhaktarin.
Gjatë seancës dëgjimore të martën më 21 shtator, Komisioni ngriti dyshime se Mërkuri ka fshehur pasuritë duke mos i deklaruar, e se ka cënuar besimin e publikut. Në lidhje me të u relatuan një duzinë me denoncimesh nga publiku, të cilave iu bashkangjit edhe një raport negativ i DSIK.
Në raport ngriheshin dyshime se prokurori ishte përfshirë në veprime korruptive në disa çështje penale, si dhe dyshime për kontakte të papërshtatshme. Megjithatë të gjitha akuzat e ngritura ndaj tij u hodhën poshtë nga prokurori gjatë seancës dëgjimore.
Magjistrati Lorenc Mërkuri e ka nisur karrierën në sistemin e drejtësisë në vitin 2003 si oficer i policisë gjyqësore në Prokurorinë e Sarandës. Ai është emëruar prokuror në vitin 2012 dhe prej dhjetorit 2013 deri në shkarkimin e tij nga detyra e ushtruroi funksionin e prokurorit në Prokurorinë e Sarandës.
