Bruskeli nuk ka një datë dhe axhendë për rifillimin e dialogut midis Kosovës dhe Serbisë qoftë edhe në nivel ekspertësh.
Zëdhënësi i BE-së thotë se takimet do të zhvillohen sapo të krijohen kushtet, ndërsa nga Qeveria e Kosovës sqarojnë se pandemia e coronavirusit ka ndikuar në shtyrjen e procesit
Pandemia e coronavirusit po përdoret nga Brukseli dhe Qeveria në Prishtinë si argument për shtyrjen e dialogut midis Kosovës dhe Serbisë.
Zëdhënësi kryesor për Punët e Jashtme dhe Politikën e Sigurisë, Peter Stano në një përgjigje për KosovaPress, nuk bën me dije se cilat tema do të trajtohen në takimin e radhës në Bruksel, por thotë se së shpejti do të caktohet data dhe agjenda.
Peter Stano: “Dialogu, pas rifillimit në korrik, po vazhdon dhe po avancon me takime në nivel ekspertësh dhe të nivelit të lartë politik. Takimi i radhës i dialogut në niveli të lartë do të thirret në Bruksel sa më shpejt që të jetë e mundur, varësisht kur lejojnë kushtet. Kur bëhet fjalë për takime në nivel ekspertësh, ne do të shpallim datën dhe agjendën e takimit të ardhshëm kurdo që situata është e përshtatshme”
Edhe këshilltarja politike e kryeministrit Hoti, Antigona Baxhaku thotë se takimet e radhës në Bruksel po diktohen vetëm nga pandemia, e jo për ndonjë arsye tjetër.
Ndërkaq nga Lëvizja Vetëvendosje kërkojnë ndërprerjen e dialogut me Beogradin.
Deputeti Artan Abrashi thotë se ky proces duhet të rifillojë pas zgjedhjeve të reja në Kosovë.
Artan Abrashi: “Zgjidhja më e mirë në këto rrethana është që të stopohet ky dialog. Të kemi një qeveri e cila është e fortë, ka legjitimitet dhe buron drejtpërdrejtë nga vullneti i qytetarëve. Përndryshe qeveria Hoti nuk e ka as mundësitë, as numrat, as dijen e asgjë për të mbrojtur interesin e Kosovës në këtë proces”
Takimi në muajin shtator ishte i fundit ndërmjet kryeministrit Avdullah Hoti dhe presidentit serb, Aleksandër Vuçiç.
Fillimisht u shfaqen dallimet për themelimin e Asociacionit të komunave serbe në Kosovë, e së fundi me arrestimin e ish krerëve të UÇK-së nga Gjykata Speciale pati kërkesa që të pezullohet dialogu edhe nga vet partnerët e koalicionit qeverisës.