Nëpërmjet një njoftimi zyrtar nga Policia e Shtetit mësohet se vetë drejtori i Përgjithshëm Ardi Veliu ka ndërhyrë për të “zgjidhur” situatën kaotike në Kakavijë me emigrantët shqiptarë të bllokuar prej 3 ditësh.
Sipas këtij njoftimi drejtori I Përgjithshëm I Policisë së Shtetit, ka pezulluar menjëherë nga detyra punonjësin e Policisë A. Ç.
Mësohet se kjo masë e marrë nga vetë nr.1 i bluve të Shqipërisë ka ardhur pasi punonjësi i Stacionit të Policisë Kufitare Kakavijë, duke shpërdoruar detyrën ka tentuar të kalojë jashtë radhe një automjet me targa greke, për në shtetin grek.
Drejtoria e Standardeve Profesionale në Drejtorinë e Përgjithshme të Policisë së Shtetit, njofton pas kësaj edhe se ka nisur menjëherë hetimin disiplinor ndaj punonjësit të Policisë, për shkelje të rëndë.
Policia e Shtetit nuk harron edhe që të falënderojë qytetarët për durimin, mirëkuptimin dhe bashkëpunimin dhe fton cilindo që konstaton raste të abuzimit me detyrën nga ana e punonjësve të Policisë, të raportojë në 112 apo në Komisariatin Dixhital, duke iu garantuar anonimatin dhe reagim të shpejtë e të paanshëm.
