Gazeta gjermane “Bild” ka shkaktuar tërmet në politikën shqiptare, pas publikimit të disa përgjimeve nga dosja “339”, për të cilën Arta Marku deklaron se “janë 700 CD të pazbardhura”.
Në përgjimet e reja, të publikuara nga e përditshmja prestigjioze gjermane, personazhi kryesor është sërish kryetari i Bashkisë së Durrësit, Vangjush Dako, i cili komunikon me anëtarë të bandës “Avdulaj” të Shijakut.
Në përgjimet e reja dalin detaje interesante, për përfshirjen e zyrtarëve të tjerë lokalë të Durrësit, të cilët, para dhe gjatë fushatës për zgjedhje të përgjithshme të vitit 2017, kanë pasur komunikime të shpeshta dhe kanë kryer favore për interes të bandës kriminale.
Dokumentat e “Bild” përforcojnë më tepër përgjimet e publikuara pak muaj më parë nga “Zëri i Amerikës”. Në atë kohë, kryeministri Edi Rama e konsideroi publikimin e përgjimeve si “jehonë të kazanit mediatik shqiptar tek Zëri i Amerikës”.
Pas deklaratave të Ramës, Kryeprokurorja e Përkohshme, e emëruar vetëm me 69 votat e socialistëve, mbajti të njëjtën linjë qëndrimi.
Në një intervistë dhënë para pak javësh në emisionin “Open” të Top Channel, Arta Marku deklaroi se “dosja 339 është nën hetim dhe janë edhe 700 CD me përgjime për t’u zbardhur”.
Në këtë mënyrë, Marku, ish-vartësja e Ulsi Manjës në Prokurorinë e Shkodrës, dha sinjalin që hetimi për dosjen “339” të Krimeve të Rënda do të vijojë gjatë dhe, me gjasë, do të sfumohet me kalimin e kohës. Gjithashtu, ajo shpërndau idenë, e ngjashme me atë të Edi Ramës, se përgjimet e publikuara nga VOA nuk ishin të mjaftueshme për të zbuluar skemën e vjedhjes dhe blerjes së votave nga Partia Socialiste në vitin 2017.
Por, përgjimet e publikuara së fundmi nga “Bild” dëshmojnë se historia e “700 CD-vë të zbardhura” është një e pavërtetë e madhe, e deklaruar me zë e figurë nga Arta Marku.
Gazeta gjermane, nëpërmjet burimeve të saj, ka siguruar dokumenta të përgjimeve nga dosja shqiptare “339”. Në këto përgjime, si edhe në ato të publikuara më parë nga VOA, është lehtësisht e kuptueshme se çfarë ka ndodhur.
Vetëm Arta Marku dhe mikesha e saj e bindur në krye të Krimeve të Rënda, Donika Prela, kanë zgjedhur që të mos i shohin e lexojnë këto akte dhe të veprojnë në bazë të tyre.
Arta-Prela kanë zgjedhur mënyrën më të shëmtuar për të kryer detyrën, të cilën e siguruan në mënyrë të kundërligjshme. Të dyja bashkë, nën vullnetin e maxhorancës socialiste, kanë vendosur të bllokojnë hetimet e dosjes “339” dhe “184”, kjo e fundit, me objekt gjithashtu vjedhje dhe blerje votash në zgjedhjet e Dibrës.
Por, “paaftësia” e dyshes Arta-Prela ka arritur kulmin, pasi nuk kanë arritur të sigurojnë “rrjedhjen e dokumentave të përgjimit”, për të ndihmuar siç duhet Edi Ramën dhe “Rilindjen” e tij të kriminalizuar.
Ekziston edhe një teori, e cila sugjeron që përgjimet kanë rrjedhur me “vullnetin” e dyshes Marku-Prela, nën dirigjimin e “mikut-armik” të Edi Ramës, Fatmir Xhafaj. Gjithësesi, në këtë histori përgjimesh, teoritë, edhe pse konspirative, mund të marrin nuanca vërtetësie, sidomos pas krisjes së raporteve mes Edi Ramës dhe ish-komunistit të konvertuar në “reformator”, Fatmir Xhafaj.
Përtej teorive, tashmë publiku shqiptar (dhe ai gjerman e europian) kanë para syve të tyre një të vërtetë si kristal-dosja “339” zbulon masakrën e madhe elektorale të projektuar dhe zbatuar nga sekti politik me emrin “Rilindje”.
Gazeta “Bild” është kujdesur që përgjimet shqiptare t’i përkthejë në gjuhën angleze, për të fituar një publik më të gjerë. Por, gjithësesi, sinjali pas këtyre përgjimeve është “gjermanisht”.
O Arta! si i thonë fjalës “përgjim” në gjuhën e Angela Merkel? Nëse nuk e di, dhe me shumë mundësi nuk e di, dërgoji një sms Edi Ramës, se ai tashmë e ka të qartë përkthimin dhe mesazhin që i mbërriti nga Berlini, nëpërmjet faqeve të “Bild”.
Boldnews.al
