Kryetarja e Bashkisë Shkodër, Voltana Ademi në një reagim në Facebook, i është përgjigjur deklaratave të Ramës. Ademi shkruan se Shkodra nën qeverisjen e saj është përmirësuar shumë dhe e krahason me Vlorën, për të cilën thotë se ka vetëm Lungomarën dhe u përmbyt pas 30 minutash shi.
Më tej kryetarja e Bashkisë Shkodër, shton se qyteti që ajo drejton në 6 vitet e fundit nuk ka marrë fonde, por ja ka dalë me mirëadministrim të lekëve që grumbullon nga taksat.
“Në qytetin bregdetar, “vepra më e rëndësishme e partisë së Rilindjes” është Lungomare- ja e famshme. Vetëm pak ditë më parë të gjithë shqiptarët, e jo vetëm vlonjatët, e panë se ku kanë shkuar miliona euro investime, pasi disa minuta shi përmbytën të gjithë Lungomare- n. Kjo është prova më e mirë dhe më e qartë se çfarë bëri “Rilindja” për 4 vite në Vlorë.
Shkodra këto 6 vite, nuk ka marrë asnjë investim nga “Rilindja” e Edi Ramës. Kjo është e vërteta që e di Shkodra dhe Shqipëria mbarë. E megjithatë, falë mirëadministrimit si një familje e madhe, me të ardhurat e vetë qytetarëve, përmes taksave që vazhdojnë të jenë më të ulëtat në vend, kemi investuar në rrugë, trotuate, hapësira të gjelbra, ndriçim, kanale kulluese, qendra shendetesore, shërbim social, shkolla e ambjente sportive…..
Kryeministri Edi Rama sot në takimin me gazetarët në selinë e qeverisë gjatë fjalës së tij përmendi dhe Shkodrën dhe kryetaren e Bashkisë, ku tha se nuk mund t’ia lënë më atë qyetar, pasi po e shkatërron. Ai tha se Ademi ankohet vetëm se nuk merr fonde, por ka 25 vite që drejton bashkinë.
