Përmes një postimi në facebook, Taçe ka deklaruar se projekti për HEC-in në Kanionin e Holtës në Gramsh do të anulohet. Ai shkruan se për anulimin e projektit ka marrë garanci nga deputeti i qarkut të Elbasanit njëkohësisht kreu i grupit parlamentar të PS, Taulant Balla.
Leja për HEC-in mbi Kanionin e Holtës është firmosur në prill të vitit të kaluar nga ish ministri i Energjisë, Damian Gjiknuri dhe më vonë është miratuar në Këshillin Kombëtar të Territorit që drejtohet nga vetë kryeministri Edi Rama. Por deri tani as ministria e Energjisë dhe as KKT nuk e kanë anulluar lejen.
Kjo është një situatë qesharake që dëshmon më së miri seriozitetin e qeverisë së Rilindjes, ku një leje ndërtimi me firmën e ministrit dhe kryeministrit premton se do ta anullojë kryetari i PS-së së Gramshit dhe deputeti Taulant Balla.
Më 27 prill të vitit 2018 kryeministri Rama firmosi miratimin e lejes për ndërtimin e HEC-it të Strorit në përroin e Holtës dhe Seltës ne Gramsh. Kompania e përzgjedhur për këtë koncesion është ERA HYDRO, e themeluar në nëntor 2016, me kapital filllestar vetëm 100 000 lekë. Për zbatimin e vendimit është ngarkuar Agjencia e Zhvillimit të Territorit në bashkëpunim me ministrinë e Energjetikës.
Pak ditë më parë përmes një postimi në Facebook, deputeti i PD Luçiano Boçi akuzoi ish-ministrin Gjiknuri se me firmën e hedhur për këtë HEC, por po shkatërron një pasuri e trashëgimi natyrore qindra mijëra vjeçare, ndërkohë që projekti ka ngjallur zemërim në publik dhe mes ambientalistëve.
Ditët e fundit një sërë organizatash ambientaliste dhe pjestarë të shoqërisë civile kanë bërë thirrje për protesta për të mos lejuar ndërtimin e HEC-it që do të shkatërronte përfundimisht një nga bukuritë më të rralla natyrore të Shqipërisë, Kanionin e Holtës, njësoj siç ndodhi me Valbonën.
- © SYRI.net
