I ftuar në emisionin ‘Tonight Ilva tare’, gazetari Artan Hoxha ka risjellë edhe një herë në vëmendje rastin e ish-ministrit të Brendshëm Saimir Tahiri, i cili javën që shkoi dha dorëheqjen nga posti i deputetit.
Edhe pse deri më tani dukej sikur s’po bëhej asgjë për të hetuar Tahirin, sipas Hoxhës ai po mbahet nën vëzhgim nga skuadrat operacionale dhe këtë gjë e kishte parë e vetë.
“Unë di që Saimir Tahiri është vënë nën vëzhgim të Skuadrës Operacionale. Që do të thotë se Prokuroria e ka vënë nën vëzhgim jo thjesht me kë flet, por edhe kë takon në rrugë. Këtë e ka bërë Prokuroria. E ka bërë tani. Unë thjesht u ula në një zonë të kryeqytetit dhe në lokalin përballë vura re që ishte Tahiri me persona që njeh dhe makina që pashë rrotull ishte Skuadra Operacionale. Prokurori ka aktivizuar edhe këtë lloj vëzhgimi.
Dorëheqja e Tahiri u ka shërbyer shumë personave. Së pari, Edi Ramës. Opozita e ka parë edhe si fitore për shkak të presionit, por i ka rrëzuar edhe një lloj kauze. Dhe thotë se është bërë marrëveshje.”, tha Hoxha.
Pas dorëheqjes, ish-ministri Tahiri pritet sa të merret në pyetje nga ana e Prokurorisë së Krimeve të Rënda këtë javë, lidhur me akuzat që rëndojnë ndaj tij për trafik të lëndëve narkotike dhe lidhjen me grupin e Habilajve.
