Pas vdekjes së vajzës 13-vjeçare nga fshati Berishë i Pukës edhe motra e saj ndodhet në gjendje shumë të rëndë shëndetësore. Mjekët e reanimacionit në pediatrinë e QSUT thonë se 11 vajza më e vogël e familjes Smajli ka një pneumoni masive në krahun e djathtë të kraharorit dhe se duhet të kalojnë 24 orë për të dalë në konkluzion nëse e ka kaluar rrezikun.
Instituti i shëndetit publik nuk ka ende një përgjigje shkencore se cili është shkaku që i mori jetën vajzës 13-vjeçare nga fshati Berishë i Pukës e dyshuar fillimisht me fruth.
Ndërkohë mjekët e shërbimit të reanimacionit në pediatrinë e QSUT thonë se edhe vajza 11-vjeçare e familjes Smaili ndodhet në gjendje te rëndë shëndetësore shkaktuar nga një pneumoni masive në anën e djathtë të mushkërisë.
Sipas Prof. Ermira Kola, shefe e shërbimit të reanimacionit pediatrik në QSUT shumë e mirë paraqitet shëndeti i dy vëllezërve Smajli 16 dhe 17 vjeç, që mbahen të shtruar në spitalin infektiv.
Mjekët përjashtojnë prekjen nga fruthi të 3 fëmijëve të shtruar në QSUT, megjithatë përgjigjen e fundit do të duhet ta japin ekspertët e ISHP që po analizojnë mostrat e marra.
