Ish-ministri i Drejtësisë, Ylli Manjani ka komentuar detajet e reja që kanë dalë për aktivitetin politikë të emrave të zgjedhur në Këshillin e Lartë të Prokurorisë dhe Këshillin e Lartë të Gjyqësorit.
Manjani thotë se nuk kemi të bëjmë thjeshtë me emërime politike në drejtësi, por me drejtim politik të gjithë drejtësisë. Komentet e ish-ministri vijnë pas publikimit në mediat të fakteve se një anëtar i KLGJ ka qenë pjesë e Fondacionit “Qemal Stafa” të Partisë Socialiste që drejtohej nga ish-minsitri Saimir Tahiri, aktualisht nën hetim për trafik droge.
Postimi i plotë i Ylli Manjanit:
“Media ka zbuluar se edhe një anëtar goglash të KLGJ, qenka marrë me veprimtari politike për llogari të PS.
Të gjithë ata janë emëruar në KLGJ e KLP, jo vetëm nga një parlament pa shumicë, por edhe nga radhët e bashkëpunëtorëve dhe simpatizantëve aktivë të PS-së.
Me neutrali ndër shfaqet thjesht si urryes i partive të opozitës!
Kjo nuk quhet më kapje, por drejtim politik i drejtësisë!
Në rotacionin më të afërt politik të pushtetit, ata duhen shkarkuar të gjithë siç janë!
Jo për tu zëvendësuar me militantë të tjerë por me njerëz të zotë e me integritet!
Opozita duhet ta premtojë këtë gjë, jo vetëm ta denoncojë!”.