Kryeministri Edi Rama dhe Kreu i Partisë Demokratike, Lulzim Basha janë përplasur sot për buxhetin. Rama e Basha kanë lëshuar akuza e kundër akuza ndaj tyre.
Replikat e plota mes Ramës dhe Bashës:
Basha: Tre propozime ka buxheti, të treja në shërbim të krimit dhe klientëve, detyrimi i çdo biznesi të vogël për të lëshuar faturë me TVSH, është një masë që nuk do sjellë asnjë përfitim buxhetor, përkundrazi do rrisë koston për biznesin e vogël. Është një politikë që do dëmtojë mirëqenien e njerëzve, prandaj është kundërshtuar nga FMN, BB, ekonomistët dhe ekspertët, sipërmarrësit e vegjël dhe vetë qytetarët. Olsi Rama ka dy vjet që kërkon të marrë me koncesion pagesën e TVSH, Rama për pak e bëri këtë koncesion, por ishte FMN, ndaj ka bërë dredhinë duke futur në skemën e TVSH 200 mijë biznese. Për pasurimin e tij dhe të klientëve të tij Rama po dënon me qindra e mijëra familje shqiptare. Mjerimi u takon fëmijëve të Bulqizës ndërsa për vëllain e kryeministrit përgatiten koncesione. Olsi Rama la Amerikën dhe erdhi sapo i vëllai u bë kryeministër. Masa e dytë e rëndësishme e buxhetit është heqja e tatimit mbi ndërtimin, fitimin dhe ulja e TVSH në 6% për të gjitha hotelet luksoze. Ky buxhet synon pastrimin e parave të drogës, duke privatizuar spitalet, shkollat, rrugët dhe çdo infrastrukturë që do t’i vijë në mendje Edi Ramës.
Rama: “Unë nuk mundem veçse të buzëqesh, duke replikuar për sharjet, fyerjet dhe shpifjet që sapo më adresoi shumë i dashuri Lul. Meqë e nise me Papa Franceskun edhe unë po e vazhdoj me të, që thotë “Flisni vetëm për mëkate e skandale, sepse iu intereson zhurma që bënë një pemë që bie dhe jo pylli që rritet”. T’i hysh gjithë atyre që u thanë është njëlloj si t’i hysh detit me këmbë. Jemi një vend që është më i bukuri, turistik në të gjithë kilometrat katror të tij, me dy dete, me erëra që fryn, me diellin që lind e perëndon më bukur se kudo dhe sot jemi i vetmi vend në Mesdhe që nuk kemi një hotel me pesë yje. Jo yje që kanë emrin e pronarit dhe një palasë nga pas. Ne do ndërtojmë hotele me pesë yje në Shqipëri dhe për këtë nuk kemi bërë asnjë shpikje, por kemi adoptuar legjislacion të ngjashëm me atë të vendeve si Mali i Zi, Kroacia, Sllovenia, etj. Po marr Malin e Zi që në këtë aspekt na ka lënë targën e nuk ia shohim më. Si do u bëka ky pastrim i madh parash, kur paketa është shumë e qartë. Kemi kërkesën e parë, quhet Avi Ponari, votues dhe sponsor i PD, kërkon të ndërtojë hotel me pesë yje në Valbonë. Po investon të ardhurat e tij legjitime. Ndryshimi i madh mes meje dhe Bashës është ky, unë nuk i ndaj shqiptarët në tanët dhe të atyre dhe kurrë nuk i fusë njerëzit në një thes. Po e mbyll me Papa Franceskun “Nuk rritesh dot nëse nuk e pranon vogëlsinë tënde”. Problemi yt është se në përpjekjen për tu bërë një kopje e të madhit, që s’na ka ardhur ende, je një kopje e pagëlltitshme e Lulit e vockël”.
Basha: “Vjen këtu e dërdëllit me batuta, për njerëz që ti vetë i etiketon si votues e financues të kësaj e asaj partie. Unë nuk i ndaj njerëzit në demokratë e socialistë, por në njerëz të lidhur me krimin dhe të ndershëm. Në demokratë e socialistë të ndershëm dhe një grusht horrash, kryesisht në partinë tënde, që i ke mbledhur ti shndërrimin e këtij vendi në lavatrice të krimit. Jemi vend kryesor për pastrimin e parave të drogës. Ti nuk e pe drogën asnjë ditë, katër vite me radhë, as gomonet, as radarët e fikur, as avionët, as ministrin. U bëre gazi i botës dhe një mëngjes u cove e the ‘e mposhtëm drogën’, duke u bërë qesharak. Po gabohesh nëse mendon se jam këtu për t’u marrë me ty. Nuk më intereson dhe s’më ka interesuar kurrë personi yt. Është detyra ime të paralajmëron ndonjë njeri që ka mbetur këtu i ndërgjegjshëm të mos e ngrejë kartonin për të varfëri të shqiptarëve. Ka hotele me pesë yje, ti dhe ministrat e tu i njihni shumë mirë. Do t’i vëmë kufirin te thana krimit e drogës”.
Rama: “Në letrën e tij Presidenti thotë “Ne duam drejtësi, jo gjueti shtrigash në Shqipëri”. Këtë të fundit nuk do ta shpjegojmë sot se është dita e tolerancës. Papën e solle ti Lul, dhe unë duke qenë se e njoh veprën e tij më mirë se ti, ta solla këtu. Pranoje vogëlsinë tënde Lul, para se të rritesh. Je fallso, prano vogëlsinë Lul”.
