Kreu i PD-së Lulzim Basha e ka cilësuar të papranueshme rrjedhjen e votave nga grupi parlamentar i PD në seancën e djeshme për votimin e Gramoz Ruçit në krye të parlamentit.
Duke iu referuar burimeve nga mbledhja,“BalkanWeb” raporton se Basha ka diskutuar me deputetët procesin e votimit të Ruçit dhe kjo çështje do të hapet sërish nesër në seancën plenare.
Basha ka deklaruar se vendimi i grupit duhet të respektohej në unanimitet dhe ka dënuar rrjedhjen e votës si dhe përpjekjen për blerjen e deputetëve.
“Vendimi i grupit ishte për ta votuar kundër. PD dënon rrjedhjen e votës në seancë, është e papranueshme. Vendimi i grupit është për t’u respektuar ne unanimitet. PD dënon edhe manipulimin e PS-së dhe përpjekjen për blerjen e deputetëve të PD në këtë proces votimi”, mësohet të ketë deklaruar Basha. Ndërkohë pas mbledhjes së grupit të PD pritet deklaratë për mediat për këtë çështje.