Një ngjarje e rëndë ka ndodhur mbrëmjen e djeshme në fshatin Çermë të Lushnjës, ku një 19-vjeçare i ka dhënë fund jetës, duke u vetëhelmuar me fostoksinë. Arjola Muçaj, studente për Ekonomi në Universitetin “Aleksandër Xhuvani” në Elbasan, pasi i ka vënë prindërit në gjumë, i ka dhënë fund jetës.
Prindërit në mëngjes e kanë gjetur në gjendje të rëndë vajzën e tyre, dhe ndonëse janë nisur me urgjencë drejt Tiranës, ka qenë e pamundur që 19-vjeçarja të mbijetojë.
Një ditë pas ngjarjes së rëndë, ka qenë mikja e saj ajo që ka dhënë disa detaje më shumë në lidhje me ngjarjen e rëndë dhe shkakun që mund ta ketë çuar Arjolën në vetëvrasje.
Shoqja, e cila prej 14 vitesh njihet me të ndjerën, tregon për “JOQ” se Arjola në shkollën e mesme në Çermë të Lushnjës ishte më të gjitha 10ta dhe ëndërronte që të vinte të studionte në Tiranë, por kjo ëndërr nuk iu plotësua dhe Arjola nisi studimet në Elbasan.
Gjithmonë ka qenë një vajzë e ndrojtur dhe prekej shpejt për një fjalë të vogël. Ditën e djeshme më lajmëruan familjarët se ajo ka pirë fostoksinë, pasi kishte ngelur në një provim”, ka treguar shoqja e Arjolës.
Gjithashtu edhe shkolla e të gjithë të njohurit e saj kanë shprehur ngushëllimet në “Facebook” për Arjolën, që nën trysninë dhe presionin e stresit dhe gjendjes së vështirë psikologjike, vendosi t’i japë fund jetës, siç raporton mikja e saj.
Sakaq, policia ka nisur hetimet për zbardhjen e plotë të shkaqeve që çuan të renë drejt këtij akti të rëndë.