Vrasja e Nelgert Patës me 19 nëntor të këtij viti, veç motiveve që lidhen me hakmarrjen për vrasjen e Elton Çiçës dhe përplasjet me grupin e tij, dyshohet se mund të ketë lidhje edhe me përplasjet mes tyre për linjat e mundshme të trafikut të drogës.
Një fakt i tillë është konfirmuar për televizionin klan nga burime pranë grupit hetimor, që është duke punuar për zbardhjen e atentatit të të dielës së kaluar.
Të njëjtat burime thanë se vrasja mund të ketë një motiv të dyfishtë që sipas tyre mund të jetë e ndërlidhur me hakmarrjen për vrasjen e Çiçës, por edhe me eliminimin e një rivali të direkt në linjat e trafikut të narkotikëve brenda apo edhe jashtë vendit.
Elton Çiça, 35 vjeç, u ekzekutua në një lokal në Tiranë, me 2 maj të këtij viti, ndërsa të dyshuar si autorë u shpallën Renato Milloshi e Jani Alia, miq të afërt të Nelgert Patës.
Hetuesit mendojnë se nga veprimet hetimore të kryera dhe nga dëshmitë e marra, kanë rënë në gjurmë të autorëve të mundshëm që ekzekutuan Nelgert Patën, rreth orës 13:50 të të dielës së 19 qershorit në fshatin Zhupan të Fierit.
Miku i tij, Ari Alinani, i cili mbeti i plagosur në të njëjtin atentat, nuk ka bashkëpunuar shumë me policinë e madje dyshohet se edhe fsheh të vërtetën
Për këtë shkak ai edhe është arrestuar nga policia me akuzën e kryerjes së veprimeve që pengojnë zbardhjen e të vërtetës.
Pata u qëllua me breshëri kallashnikovi, pak momente pasi kishte dalë nga një hotel në qytetin në rrugën Seman- Fier, ndërsa udhëtonte si pasagjer në një automjet Volksëagen që drejtohej nga Ari Alinani.
Autorët u larguan me një veturë “Mercedez- Benz”, të cilin e dogjën në fshatin Zhupan të Fierit. /TvKlan
