Ndërtimi dominon investimet në ekonominë shqiptare. Sipas të dhënave nga Instituti i Statistikave, për periudhën nga viti 2010 deri në vitin 2014, ndërtimi zë mesatarisht rreth tre të katërtat e formimit të kapitalit fiks në ekonominë shqiptare. Vlera e investimeve në ndërtim, ashtu si edhe pesha e ndërtimit ndaj investimeve totale, kanë pësuar një rënie të lehtë nga afro 80% në vitin 2010, në rreth 73% në vitin 2014, por, megjithatë, ky sektor ngelet dominues, me diferencë të thellë nga sektorët e tjerë. Nga rreth 2.5 miliardë euro kapital fiks që formon ekonomia shqiptare, mbështetur në ritmin e viteve të fundit, 1.8 miliardë euro janë ndërtime. Ndërtimet rezidenciale zënë peshën kryesore brenda sektorit ndërtues, por, që nga viti 2012 e në vijim vlera e tyre paraqitet në rënie, ashtu si edhe ndërtimet tregtare. Tendencë të kundërt kanë ndërtimet inxhinerike që janë segmenti i vetëm që ka njohur rritje nga viti 2012 deri në vitin 2014. Për pjesën tjetër, investimet në ekonominë shqiptare shkojnë sidomos për makineri dhe pajisje, me 16% të totalit dhe për mjete transporti, me rreth 5%. Megjithëse për bujqësinë flitet shumë, shifrat tregojnë qartë se nuk ka asnjë zhvillim madhor në drejtim të zhvendosjes së kapitalit drejt këtij sektori. Investimet në bujqësi në vitet e fundit kanë qëndruar në rreth 2.5% të totalit të kapitalit fiks të krijuar në ekonomi. Vlerësohet se në bujqësi investohen çdo vit rreth 65 milionë euro, në pjesën dërrmuese në pemtari e vreshtari, shumë kjo qartësisht modeste për të mbështetur rritjen e një sektori të zhvilluar nën potenciale. Një tjetër e dhënë domethënëse për zhvillimin e ekonomisë shqiptare është vlera e investimit në teknologji. Sipas Instat, në vitin 2014 investimi total në prgrame kompjuterike dhe baza të dhënash për vitin 2014 ishte vetëm 194 milionë lekë, me një peshë krejt të papërfillshme ndaj totalit.
Kjo dege e ekonomise eshte me fitim pruresja per Edin dhe qeverine se u kerkohet ndertuesve perqindje per lejen !