Ai akuzohet për “korrupsion pasiv të gjyqtarëve”, pasi ka marrë 6 milionë lekë nga një person i cili ishte palë në një proces gjyqësor civil që drejtohej nga gjyqtari

Besar Bajraktaraj

Prokuroria për Krime të Rënda i ka komunikuar ditën e djeshme gjyqtarit të Gjykatës së Tiranës, Ibrahim Bashës, akuzën duke e marrë si të pandehur. Ai akuzohet për “korrupsion pasiv…të gjyqtarëve…”, pasi ka marrë 600 mijë lekë të reja nga një person, palë në një proces gjyqësor civil që drejtohej prej tij. Kështu burime zyrtare nga prokuroria bënë të ditur se së bashku me gjyqtarin, Prokuroria për Krime të Rënda i ka komunikuar akuzën edhe Dritan Jazhexhiut dhe Novruz Gajdes, të akuzuar për “korrupsion aktiv të gjyqtarëve…”.
Gjithashtu, i është komunikuar akuza edhe shtetasve Lejdon Hoxha, (i biri i gjyqtarit), i akuzuar për “Veprime që pengojnë zbulimin e së vërtetës”; Altin Malaj, për veprën “Moskallëzim krimi”; dhe Gerald Hoxha, për veprën e “Deklarimeve të rreme…”. Për këtë të fundit ka rezultuar se ka qenë në dijeni të veprimeve të mësipërme dhe ka deklaruar rrethana të rreme para oficerit të policisë gjyqësore. Prokuroria për Krime të Rënda bën me dije ka zhvilluar hetimet, në bazë të të cilave ka rezultuar se shtetasi Dritan Jazexhiu ishte në një proces gjyqësor civil, i cili zhvillohej në Gjykatën e Tiranës, nën drejtimin e gjyqtarit Ibrahim Hoxha. Jazexhiu, nëpërmjet shtetasit Altin Malaj, është njohur me të pandehurin Novruz Gajdja. Ky i fundit ka marrë përsipër që të ndërhynte te gjyqtari Ibrahim Hoxha, me qëllim që ai të jepte vendim gjyqësor në favor të tij. Në vijim të veprimeve hetimore, Prokuroria për Krime të Rënda deklaron që ka zbuluar se gjyqtari Hoxha ka kërkuar shumën 800 mijë lekë të reja, për të dhënë vendimin në favor të Dritan Jazexhiut. Gjithashtu prokuroria deklaron se sipas hetimit, është provuar se të pandehurit kishin rënë dakord që pjesa e parë e parave, prej 600 mijë lekë, të jepej një ditë para vendimit. Pjesa e mbetur e parave, 200 mijë lekë, do të jepeshin pas dhënies së vendimit.
Mësohet se nga ndjekja në dinamikë e hetimit, ka rezultuar se në dt. 02.05.2016, i pandehuri Novruz Gajdja, bie dakord me gjyqtarin që të realizohej “shkëmbimi” i shumës 600 mijë lekë pasditen e asaj dite. Të pandehurit kanë qenë nën vëzhgim nga Policia Gjyqësore, me urdhër të Prokurorisë. Pasditen e datës 02.05.2016, i pandehuri Novruz Gajdja, pasi kishte marrë shumën prej 600 mijë lekë nga Dritan Jazexhiu, takohet me djalin e gjyqtarit, Lejdon Hoxha, të cilit i dorëzon shumën e parave. Menjëherë kanë ndërhyrë forcat e policisë, të cilët kanë realizuar arrestimin në flagrancë të shtetasve Lejdon Hoxha dhe Novruz Gajdja. Po në bazë të veprimeve hetimore në dinamikë, është realizuar edhe arrestimi i gjyqtarit, Ibrahim Hoxha dhe shtetasit Dritan Jazexhiu. Në përfundim të veprimeve procedurale, Prokuroria për Krime të Rënda ka marrë të pandehur shtetasit e mësipërm, të cilët gjenden nën masat e sigurimit, si vijon:

1. Ibrahim Hoxha, “arrest në burg”
   Dritan Jazexhiu, “arrest në burg”
   3. Novruz Gajdja, “arrest në burg”
   4. Lejdon Hoxha, “detyrim për t’u paraqitur”
   5. Altin Malaj, në gjendje të lirë
   6. Gerald Hoxha, në gjendje të lirë