Prapa djegies së një lokali nate ku luhej muzikë latine (Mojto) mëngjesin e 23 qershorit, në Porto Sant’Elpidio, Itali, dyshohet se qëndrojnë disa shqiptarë, shkruajnë mediat italiane.
Pas zbulimit të një skuteri një ditë pas ngjarjes pranë lokalit, me të cilin dy autorët e dyshuar të zjarrëvënies kishin shkuar në vendngjarje, rrethi i hetimit është ngushtuar. Karabinierët kanë gjetur kaskën dhe një maskë pranë gërmadhave të lokalit, dhe departamenti i hetimeve shkencore është duke analizuar gjurmët e AND-së që gjenden në to.
Dyshohet se djegia e lokalit të natës, të kthyer në një tempull të muzikës latine në bregdet, është porositur nga disa shqiptarë, që drejtojnë një diskotekë jo larg lokalit latin.
Shqiptarët i kishin ofruar bashkëpunim gjatë verës pronarit të Mojto-s, por ky i fundit kishte refuzuar. Kjo, mund të ketë sjellë një pakënaqësi të madhe as sa shqiptarët mund të jenë hakmarrë, raportojnë mediat italiane.
Megjithatë, kjo mbetet ende një hipotezë.
