Nga Artan Fuga
Jo në auditorë, se ato nuk i di, por në shfaqjen publike, atë që më paraqitet si qytetar.
- Me forcën e shtetit disa nga konkurrentët kryesorë në tregun privat u hoqën qafe përpara disa muajsh. Jo se e meritonin të rrinin, por nuk dukej se ishin më keq se shumë të tjerë që janë martuar e po trashëgohen. Si dikur në kohën e punizmit kur gjoja respektoheshin meritat në shkollim të disave, ndërkohë që të tjerëve u pengohej e drejta për arsim politikisht.
Ju heq konkurrentët, tani luani lirshëm sipas ligjeve të tregut pa konkurrentë.
Çmimet e studimeve hipin në stratosferë, më lirë është të studiosh në universitete shekullore në Itali, Spanjë, Francë, Poloni, Çeki, sesa te rioshët universitarë shqiptarë.
Doni prova? Pa fund. Krahasoni pak çmimet dhe do ta shihni. Një popull që po e rrjepin gjithandej.
Pse disa u quajtën të pariparueshëm dhe disa u dënuan me kusht! Publiku kurrë nuk e mori vesh!
Nuk kishin as më pak e as më shumë shkelje nga universitetet e tjera private gjeneraliste që japin diploma, por jo akses në tregun e punës për të diplomuarit.
Shkalla e punësimit studentor është jashtëzakonisht e ulët.
Dikush jepte diploma me qillo raki, dikush mbahej edhe duke dhënë bursa për forumet rinore të partive politike si formë korrupsioni dhe klientelizmi politik e dënueshme nga ligji. Doni t’i bëjmë publike???
Paraqitet si reformë mbyllja e tyre, kurse ajo e shumta është normë dhe jo reformë, sepse të kërkosh aplikimin e një ligji në fuqi prej vitesh nuk është reformim, por thjesht normativizim. Përndryshe çdo polic në rrugë që vë rregull në trafik do të quhej reformator.
Amoraliberalizmi është mbështetur te goditja me sqepar administrativ e konkurrentëve në treg dhe me filtra burokratikë bllokues për ata që hyjnë në treg. Ndërsa ata që trajtohen në mënyrë favorite për shkaqe lidhjesh politike promovohen dhe shpallen si tregtarë të ndershëm.
- Rektorë të ndonjë universiteti, që i doli boja si kioskë e përdhosur, vazhdon të mbeten në treg dhe na japin mësime morale se si duhet të jetë universiteti universitar shqiptar.
Kuje o kuje, në vend të ndalohet me urdhër administrativ dhe t’i hiqet licenca për të qenë administrator i fateve studentore na dërdëllis ende nëpër ekrane si megafon kundër doktor Zhivagos.
Riciklim mëkatari si formë sundimi.
Po ashtu, dikush në hall se ka grabitur pa leje një tokë, ndërtim pa leje plus zaptim toke, përpiqet të mos i hyjë gjemb në këmbë duke bërtitur: Urraaaaa për çdo parakalim 1 maji, qysh në 1 prill, edhe sot.
Mëkatar që halli e bën të struket e të jetë altoparlant i politikës nuk mungon.
Gërmoni, gërmoni!
- Tregu është ndërtuar mbi favoritizmin sepse ligja e vendos universitetin publik nën thundrën e politikës dhe burokracisë kur edhe për të blerë një fshesë duhet kaluar nga pastruesi i universit që me qerre diellore endet nëpër galaktika. Politika blloko, degjeron, fyej, paralizo universitetin publik që të krijosh zhbalancime në oportunitetet në treg në favor të operatorit privat është e dënueshme, por kush ta dënojë se, të vdekmit?, është kulmi i punizmit, madje i formave kiliane kur shteti zotëron tregun bazuar mbi mungesën e lirive demokratike dhe urdhrit shpesh verbal.
- Sa mirë, rektorë të pavarur!!!
Ka disa prej tyre që janë të respektueshëm, rrallë, por çfarë na duhen gjoja të pavarur dhe të pavarur nga kush? Nga pronari? Më vjen të shkulem gazit!
Por a ka pedagogë të pavarur në sektorin privat, a kanë status të njohur me ligj, a kanë pavarësi nga pronarët apo çdo teke e pronarit eventualisht mund t’i heqë nga puna, mund t’i flaki si limonë të shtrydhur? Ku janë të drejtat ligjore për profesorët te privati, se rektorë të pavarur nuk na duhen edhe aq.
Rektorët të varin nuk varen.
Kjo situatë pa të drejta, sikurse e gazetarëve, i ndrysh profesorët dhe i detyron të pësojnë presione për t’u bërë altoparlantë si media kundër doktor Zhivagos kundër një studenteje që i hipën në kokë të gjuajë me vezë.
Antidoktor Zhivagoja numër tridhjet e një, me gjuhë joletrare shqipe çirret me histerizëm nga mediat e antidoktor Zhivagos se gjuajtja me vezë është neomarksizëm, çfarë përkufizimi?
Tamam shkencor!!!
Hajde mendje hajde!
Dhe gjuajtjen e vezëve barazohet me universitetin publik a thua se universiteti publik dhe një studente që gjuan me vezë për qejf e përgjegjësi të saj implikon institucionin.
Hajde neo marksizëm-leninizëm hajde, hajde lejfenizëm hajde!
Pavarësi në ombrellën e politikës të ditës. Ku i mjeri njeri detyrohet nga halli të bëjë propagandë kundër armiqve të popullit!
- Operatorë të vegjël në tregun e arsimit universitar duken si të trullosur nga gjendja marramendëse saqë në mënyrën më të panatyrshme për një sjellje normale në treg futen nën ombrellën që e sundon tregun, median, politikën.
Halli na detyron o mik të bëjmë gjëra krejt të panatyrshme…
Delja që po e ha krokodili duke i thënë: xhan, xhan, jemi shok, nuk po të ha, por po të kullufis në bark për të të mbrojtur nga ujku që pret të të shqyejë atje matanë.
Ujku neomarksist që gjuan me vezë!!!
Çfarë komedie!
Çfarë ki ti more me arsimin privat?
Por, kur antidoktorë Zhivagot merren gjithë ditën me arsimin publik, i bëjnë ligjin dhe rregulloret, si qytetarë a nuk jemi të lirë të mendojmë për gjithçka!
